"Министр Дәурен Абаев түк те бітіре алмайды"

"Бұған дейін Елбасы сөзін тәпсірлеп келген Дәурен Абаев министр болса Қазақстандағы идеология мәселесі шешіліп кетіп, бүкіл әлеуметтік желіде отыратын "бұзықтар" тәртіпті бола қалатындай сезілді. Елбасы ерекше пәрмен беретіндігін де айтты.

Алайда, қайта-қайта сүйегі шашыла беретін, бірақ оны Елбасы байқамай қала беретін Байланыс және ақпарат министрлігінің қаңқасын қайта жинағаннан қандай нәтиже шығаруға болады? Жарайды, кадр санын 10-15 адамға арттырған шығар, Орталық коммуникация қызметін астына салып берген шығар, бірақ, Қазақстанды осындай жағдайға жеткізген басшылар Президент әкімшілігінде, Үкімет кеңсесінде әлі отырған жоқ па?! Ол билік басындағы "бүлдіргілердің" орнына "трезвый" ойланып, нақты шешімдер жасай алатын адам келмей, Абаев министр болғанмен не бітірмек?" деп толғанған оқырман. 
"Ия, түк те бітіре алмайды. Өйткені министр Абаевқа орынбасарларынан бастап жауапты хатшыны да, комитет төрағаларын да, ол аз десеңіз департамен директорлары мен төраға орынбасарларын да бұған дейін бәленің бәрін бүлдіріп келген билік басындағы "бүлдіргілер" көнсе ыммен айтып, түсінгісі келмесе зорлап тағайындатқызады. Оған да көнбесе баяғыда өзі желдей есіп жүретін Елбасы қабылдауының есігі тарс жабылмақ.
Жабылған есік қайта ашылады деп те ойлауыңыз мүмкін. Бірақ, бұған дейін сол "бүлдіргілерге" қарсылық көрсеткен жас шенеуніктердің тағдыры қазір не болып жатқаны айтпаса да белгілі. Осылардың кебін Абаев кимеуіне кім кепіл? Өткенге талдау жасай келе Абаев үшін Ақорданың есігі бір жабылса ашылмайтынын ол да біледі. Осыларды біле тұра қалайша "бүлдіргілерге" қарсылық танытпақ? Ия, тырмысып бағып жатыр. Өзінен қаржылық жауапкершілікті алып тастау үшін "Матаевтікі" сияқты жеке БАҚ-қа мемлекеттік тапсырыстарды үлестіретін арнайы Қор құруда. Бұдан кейін қаржы мәселесі бойынша шенеуніктер емес, құрылған Қордың басшылары істі болмақ (Құдай басқа салмасын!)" деп жазылған хатта.