ОҚО-ның көне ауданында қамыстан құрылыс материалдары шығарылады
Оңтүстік Қазақстан облысы, Отырар ауданының кәсіпкерлері қамысты кәдеге жаратуды қолға алды. Ауданның Қарғалы ауыл округінде орналасқан «Ақмерген» ЖШС-і жаңашыл жобаны жүзеге асыру үшін жергілікті жерде көп өсетін табиғи қамысты пайдаланбақ. Теңдесі жоқ бұл өндіріс түрі республика бойынша Отырар ауданында ғана қолға алынып жатыр, деп хабарлады әкімдіктің баспасөз қызметі.
Аталған жоба «Үдемелі индустриалды-инновациялық даму» бағдарламасы аясында индустриалды картаға енген. Осы мақсатта жалпы құны 622,3 млн. теңгені құрайтын кәсіп түріне «Өндіріс - 2020» бизнесті қолдау бағдарламасы аясында 320 млн. теңге жеңілдетілген несие берілген.
Қазіргі таңда мұндағы құрылыс жұмыстары бітіп, цехтың құрылғылары орнатылуда. Өндіріс орнына қамыс оратын, жинайтын және өзге де қажетті техникалар алынған. Жоба 2017 жылы толық іске қосылады деп күтілуде. Жылына 750 мың шаршы метр өнім өндіруге қауқары бар цех іске қосылғанда жергілікті 30-ға жуық адамды тұрақты жұмыспен қамтитын болады. Ал кәсіпорыннан шығарылған қамыс плиталары жиһаз жасау, ғимараттардың ішкі, сыртқы әрлеу жұмыстары мен қаптау үшін қолданылатын болады.
Жоба жетекшілерінің айтуынша, нарыққа шығарылатын бұл өнімдер Ресей, Қытай материалдарынан арзан әрі сапалы болмақ. Дайын өнімдерге қазірдің өзінде қызығушылық артып, тапсырыс берушілермен алдын ала келісімдер жасалып қойылған.
- ЮКО
- ОҚО
- ОҚО кәсіпкерлері
- экономика
- инновация
- құрылыс материалдары
- корерспондент
