Қоғам қайраткері: "2011 жылғы қанды оқиғадан сабақ алмадық"

«Ақтөбе облысында болып жатқан жағдай елді қатты толқытты. Халық қорықты, құты қашты. Не деуге болады? Мен өзім біреу жеңді, біреу жеңілді деп айта алмаймын. Біз азаматтарымыздан айырылдық! Қазақты бөле жарудың қажеті жоқ. Неге бұлай болды? Біз неге 2011 жылғы жағдайдан сабақ алмадық? Қандай қателік жібердік? Не істеуіміз керек? "Жауызды өлтірдік, қырдық, жеңдік" деп айту оңай. Бірақ, дұрыс сабақ алмасақ, дұрыс шешім қабылдай алмасақ, бұл уақытша ғана саябырсу», - деді қоғам қайраткері Амангелді Айталы.

Саясаткер лаңкестерді қырып салғанның өзінде тыныштықты ұстап тұрудың қиын екенін айтты. Қаза тапқандардың басым көпшілігі  қазақ екенін еске салған саясаткер биліктің жағдайға адамгершілікпен қарау керектігін айтты.

«Сондықтан мемлекет, оқу орындары, билік осы мәселе жөнінде терең ойлауы керек. Бұл жерде ешқандай дін туралы сұрақ жоқ. Бұл жерде әлеуметтік, психологиялық жағдай бар. Біз ең бірінші оқиғаны ой елегінен өткізіп, барлығына көңіл айтуымыз керек. Өкінішті жағдай. Адамгершілік деңгейде болуымыз керек. Қазақты бөліп жармайық, бәрі біздің бауырымыз», - дейді  саясаткер.