Жаңа оқу жылында тағайындалған бір ауданның №1 мұғалімі өз «саясатын» жүргіземін деп жүріп кейбіреулерге жақпай қалыпты. Жақпағаны сол, қит етсе білім бөлімін кінәлап шыға келетіндер таяуда болған келеңсіз жағдайға да бас мұғалімді кінәлап жүрген көрінеді.

Оңтүстіктегі курортты аудандардың бірінде көгілдір отынға деп бөлінген ақша «адасып», басқа мақсатқа жаратылып кетіпті. Биылғы жылдың соңына дейін көмір жағудан құтыламыз деп отырған ауыл тұрғындары бұл жайсыз хабардан кейін ауданның №1 басшысына деген өкпесі қара қазандай болып, оны қалайда құртудың амалдарын қарастырып жүр екен.

«Нұр Отанның» облыстағы филиалына «первый зам» болу да екінің біріне бұйыра бермейді. Таяуда болған әкім тағайындаудан кейін ОҚО-дағы осы бір жайлы кресло босап қалды. Төрағаның 1-орынбасары болуға таласып жүргендер бүгінде «жарыс жолына» түсіп кетіпті.

Таяуда Оңтүстіктегі телегей теңізі болмаса да, сауық құруға таптырмайтын алып су қоймасы бар ауданға әкім тағайындалды. Біразырақ уақыт басиесіз тұрған ауданның экс-әкімі жағажайдағы жағымсыз жағдайдан кейін, яғни жұмыс уақытында алкогольдік ішімдік ішіп, оның соңы өзара төбелеске ұласып, бір-бірін арақтың бөтелкесімен ұрып, бірінің басы жарылған соң, әкім көп ұзамай жылы орнын босатып, жұмыстан кетуге мәжбүр болған еді.

Түнеугүні ОҚО әкімі Жансейіт Түймебаев әкімдік мәжілісінде бірқатар облыстық басқарламалардың жұмысына көңілі толмай, қынжылып еді ғой. Арасында Мәдениет басқармасының басшысы Нұрболат Ахметжанов та бар. Аталмыш саладағы біраз кемшіліктерді тілге тиек еткен өңір басшысы бұл бағыттағы шаруаларды кішкене жүрекпен жасау керектігін ескерткен-ді.

Бір кездері Оңтүстікте мемлекеттік қызметтегі біраз лауазымдардың құлағын ұстап, кейін бағы шапты ма, әлде бабы шапты ма, кім білсін, Арқа төріне қарай жылжуды құп көріп, орталық органдарда тәп-тәуір қызметтер атқарған бір кісі туған топырағына оралғысы келіп жүр екен.

Қарашаның ортасында Астанадағы «ЭКСПО-2017» халықаралық көрмесіне арнап салынып жатқан екі ғимараттың арасындағы көпір құлап еді ғой. Және сол тұста құрылысты «BI Group» компаниясы жүргізіп жатқаны, сондай-ақ нысан әлі қабылданып алынбағандықтан, оны мердігер мекеме өз есебінен қалпына келтіруі тиістігі де айтылған-ды.

Қаншалықты рас, өтірігін қайдам, ел аузында «Хатшылықтан босаған ОҚО мәслихатының депутаты Қамытбек Айтөреев бұрынғы лауазымын аңсайтын көрінеді. Оның үстіне Шардара ауданы әкімінің орны да біраздан бері бос тұр, соған тағайындалуға қам-қарекеті бар сияқты» деген әңгіме жүр.

«Киелі орынның бос тұрмайтыны» рас. Оңтүстік Қазақстандағы бірер ай бос тұрған облыстық мәслихат хатшысы лауазымы өз иесін тапты. Жайлы креслоға танымал кәсіпкер депутат Қайрат Балабиев жайғасты. Иә, Шардарадағы шатаққа байланысты Қ.Айтөреев босағаннан кейін «Ендігі хатшы кім болады?» деген тұрғыда жалпақ жұрт біраз сәуегейлік жасағаны – есімізде.

Биыл Оңтүстікке қыс ерте түсті. Қазан айының ішінде-ақ екі мәрте қар жауып үлгерді. Ал қазір төңіректің бәрі – ақ қар, көк мұз. Алайда Шымкент қаласын көгалдандыруға «непогода» түк те кедергі келтірмейтін сияқты. Жаппай ағаш отырғызу науқаны басталып кетті.