Көршіні таңдауға болар, ата-ананы, туысты таңдай алмайсыз. Шіркін, бұларды да таңдай алсаңыз ғой... Егер бұларды да таңдауға мүмкіндік болса, «Егемен Қазақстан» газетінің бас редакторы Еркін Қыдыр ағамыз Құдай біледі, Қыдыр шалға емес, Қыдырәлі шалға немере болар еді деп ойлаймыз. Себебі дәл бүгінгі таңда Ақпарат министрі Дәурен Абаевқа Қыдыр атадан гөрі Қыдырәлі атаның ұрпақтары сүйкімдірек болып тұр. Енді талғамға таласпайсыз ғой, солай емес пе?! Егер Еркін Қыдыр ағаның қолынан келсе, Шәуілдірде де туылмас еді. Төлқұжатындағы «туылған жері» деген графаға ақыры ОҚО деп жазылатын болған соң Отырарда емес, басқа ауданда-ақ туыла салу керек еді. Қайтеді, мұның қолында емес, мұның қолында болса, ру, жүзді де бірнәрсе етіп реттеп алуға болар еді ғой. Қызметте өсу үшін руын жылда ауыстыратын қулар аз ба, қазір?! Деп ойланып кететінімізді кімнен жасырайық?!

Нұрлан Нығматулин Мәжіліске қайта оралды. Біреулер мұны «кланаралық қақтығыстардың жеңісі» дейді. Екіншісі «елдегі биліктің бейнесі өзгере бастағанының көрінісі» дейді. Біздіңше, Нұрлан Зайроллаұлының заң шығарушы органға тағайындалуын бір оқпен екі қоянды атуға теңеуге болады. Елбасының үзеңгілесі, әрі беделді саясаткердің бұл тағайындалуы, біріншіден, Мәжіліс пен Министрлер кабинетін жақындастыру, екіншіден, соңғы бірнеше айда Қазақстандағы тіршілік түрлі оқиғалардың ортасында қыз-қыз қайнап жатса да, сайланғанына бір тоқсан болған Мәжілістің мардымды жұмысы әлі көрінетін емес. Нығматулин бүған дейін де төменгі палатаның тізгінін ұстағандағы жұмысы нәтижесіз болмады. Бұл жолы да қысқы ұйқысы әлі ашылмаған депутаттарды оятары сөзсіз.

Мемлекеттік хатшы. Бір қарағанда, әжептәуір-ақ лауазым. 2007 жылдың 13 тамызында Президенттің жарлығымен бекітілген өз мәртебесі мен өкілеттігі бар. Тек мемлекет басшысына бағынып, соның тапсырмаларын орындайды. Міндеті – Елбасы үшiн iшкi және сыртқы саясаттың негiзгi бағыттары бойынша ұсыныстарды тұжырымдап, Парламентпен, басқа да мемлекеттiк органдармен, қоғамдық бiрлестiктермен, сондай-ақ халықаралық қарым-қатынастарда оның мүдделерiн бiлдiредi. ҚР Президенті жанындағы түрлі консультативтiк-кеңесшi органдардың қызметiн үйлестiредi. Шет мемлекеттердiң елшiлерiнен сенiм грамоталарын қабылдайды. Байқасаңыз, аты дардай болғанымен, мемлекеттік хатшыға байланып тұрған дәнеңе жоқ. Егер тура осы құзырет АҚШ-тың мемлекеттік хатшысына берілсе, әй, бұл лауазымға ешкім қызыға қоймайтын шығар. Себебі, ондағы мемлекеттік хатшыңыз бүтін бір елдің сыртқы саясатына жауапты. «Госдептің» қожайыны. Әрі олай-бұлай болған жағдайда президенттің орнын алмастыра алатын 4-ші адам. Оның үстіне аталмыш қызметтің 227 жылдық тарихы бар.

Жаңадан біреу министр я әкім болып тағайындала қалса, сол адам туралы ерекше қызығушылық таныту – қазақ қоғамының қашанғы әдеті. Министр болған адам кім, бұрын қайда істеген, кімнің туысы, қай топтың өкілі – қарапайым қазақстандықтарға мұның бәрі қызық. Осы жиырма бес жылдың ішінде министр болған адамдардың арасынан кімдер шықпады дейсіз?!

Апта бойы Ақтөбе жұртын үрейде ұстап, күллі қазақстандықтарды қорқынышқа батырғысы келгендердің де көзі жойылды. Жоғарғы жақтағылар қылмыскерлерді жою шарасының сәтті аяқталғаны туралы баяндап та үлгерді. Дегенмен осы уақиғадан кейін бірнеше сұрақ жауапсыз қалды. Соның ең бастысы – құзырлы қызметтер бұған қалай жол берді?

Соңғы кезде орыс тілді бұқаралық ақпарат құралдарында «ұлтшыл-патриоттар» мәселесі жиі айтылып жүр. Мұны іліп алып, Ресей басылымдары да тақырыпқа май тамызып отыр. Қазақстанның орыс тілді тұрғындарының алдында ұлт патриоттарын ұлтшыл-патриоттарға айналдырып, сол арқылы оларды бергісі бүлікшілер, арғысы Әзірейілге теңестіру талпынысы байқалады. Бұл қоғам санасын бақылау әрі басқарудың тәсілі. Ресми тілдің аясы кең бүгінгі біздің қоғамда осынау пиғыл бірте-бірте өңделіп, өсіп, бір күндері жері мен ұлты жайлы сөз қозғаған қазақ «халық жауы» атанып жүрсе, таң қалмаңыз.

Тақырыпты бұлай қоюымыздың мәнісін аздап түсініңкіремей отырған боларсыз. «Месси кім? Мәсімові несі? Екеуінің арасын не байланыстырады?» деп. Иә, иә, ойыңызға ә дегеннен-ақ Аргентинаның атақты футболшысы, әлемге әйгілі Лионель Андрес Месси сап ете қалды ма? Қателеспедіңіз. Меңзеп отырған Мессиіміз – сол. Ал, Мәсімов? Жер-жаһанға мәшһүр болмаса да, өзіміз білетін, бәріміз танитын Кәрім Қажымқанұлы ғой. Қазақстанның Премьер-министрі. Бірі – спортшы. Бірі – саясаткер. Әйткенмен екеуін тоғыстыратын бір нүкте бар. Ол – «Панама жанжалы».

Дағдарыс дендеген сайын Қазақстанның Үкімет басшысы Кәрім Мәсімовтың жұмысына көңілі толмайтындардың қатары көбейіп келеді. Премьер-министр сарапшылардың да сын садағына жиі ілігіп жүр. Әлеуметтік желілерде оның отставкаға кетуін талап ететін жазбалар қаптап кетті. Мамыр айының басында өткен жиында Елбасы да министрлер кабинетінің жұмысын жаратпай тастамағанымен, қатты ақсағанын қадап айтты. Соған қарамастан заманауи Қазақстан тарихында Үкіметтің тізгінін ең ұзақ ұстаған Қажымқанның ұлы орнынан кетпек түгіл, мұрты да қисаймағанын көріп жүрміз.

Жер кодексіне қатысты жұрт митингке шығар шықпасын анықтай алмай арпалысып жатқан тұста жағаласып тағы бір «жаға ұстатар» жаңалық жарқ ете қалды. Астанада 79 миллиард теңгенің пантеоны салынатын болыпты. Түсіндіре кетейін, «пантеон» деп грек тілінен аударғанда құдайларға арналған ғибадат орны дегенді білдіреді екен. Қысқаша айтқанда – Құдайлар үйі. Сонда қазақ 80 миллиард теңгеге қай «құдайына» үй салғалы жатыр?

Мәдениет министрі Елбасыға жағынудың тағы бір жаңа әдісін тапқан сияқты. Өткен жылы ашық аспан астында «Аида» операсын қою үшін ел бюджетінен 150 миллион жұмсаған министр Ұлттық мұражайға ілу үшін тап осындай сомада Елбасының суретін салдырып жатқанын сүйіншілегендей күллі жұрттың көзінше жария еткен еді. Ал жуырда Мәскеудегі Кино үйінде өткен Елбасы туралы бесінші киноның тұсаукесерінде алтыншы фильм түсіретінін айта салған Арыстанбек Мұхамедиұлының мұнысын көпшілік не жағымпаздыққа, не киноиндустрияға деген жанашырлыққа жатқызарын білмей әбден шатасқанға ұқсайды.