Журналистерге "балалар" деп сұхбат берген депутат Қарақұсова өз ісіне өкінді (видео)

Төртінші билік өкілдеріне «балалар» деп қарата сөйлеген мәжілісмен Гүлжан Қарақұсова енді топырлаған журналистерге сұхбат бермейтінін мәлімдеді. "Пекин Палас" қонақүйінде бірқатар әріптестері уақытша тұрып жатқаны туралы айтқан пікіріне қатысты  сұқбат берген депутат осыйла деген. Бұл туралы Today.kz жазды. Өз сөзінде халық қалаулысы ол қонақүйде бір тәулік тұру кей журналистер айтқандай 120 мың емес, 29 мың теңге болғанын еске салды. Қарақұсова енді журналистер тобына сұхбат бермейтіндігін және жеке ғана тілдесуге уәде етті.

- Парламенттің шаруашылық басқармасы 29 мың теңге екенін көрсетті. Қазақстандықтардың қандай пікірде болғанын білмеймін (Қарақұсованың кешегі айтқанына байланысты), өйткені уақытым жоқ. Бізде жұмыс қауырт және жауапты жұмыс, - дейді Қарақұсова "Пекин Палас" әріптестерінің ермегі болмағанын қоса айтып. – Ауыз ашпастан бұрын Парламент шаруашылық басқармасының мәліметтерін аш, ол жерде тендер қашан өтетіндігі мен бағасы көрсетілген. Мен фактілерге сенем. Тендер болған. Депутаттар онда ары асса екі апта тұрған. Қазір көшіп жатыр".  

Депутаттың пікірінше,  қазіргі кезде әлеуметтік желілер, соның ішінде Facebook ақпаратты бұрмалау мен ішінен бір бөлігін ғана жұлып алу арқылы қоғамда шиеленіс тудырудың құралы болып барады.

"Айтқан сөзімнен бас тартпаймын. Мен тек өзімнің эмоцияға беріліп кеткеніме өкінем. Мен барлығын дұрыс айтқанмын. "Қалай жұмыс атқарады" емес, "қайда жұмыс атқарады". Бір сөзді ауыстырып жіберген. Адам қайда жұмыс істейді. Депутат та үкіметтің айнасы екендігін тағы да айтамын", - дейді ол.

Ол өзінің қарапайым отбасынан шыққанын және алдымен министр, кейін депутат болғаннан кейін, өзінің халыққа қызмет ететіндігін еш уақытта ұмытпағанын айтады. Гүлжан Қарақұсова интернет пайдаланушылардың оның туыстарын да қаралағанына қапаланғандығын жеткізді.

Дау тудырған "кім қалай қамтамассыз етілсе, солай жұмыс атқарады" деген сөзге қатысты "қалай" деген сөздің орнына "қайда" деген мағынада айтқанын жеткізді.

"Мен статус туралы айтқанмын: қалай жұмыс атқарады емес, қайда жұмыс атқарады. Депутаттар жөнді қонақүйде тұру керек, өйткені олардың уақыты тығыз, оларға іскерлік таңғы асқа, келісімге ... келуі мүмкін. Олардың қай жерде өтетіні маңызды. Біз депутаттардың тұлғалары туралы емес, заңнамалық үкімет жайында айтып отырмыз. Қазір барлығы "Пекин Паласта" депутаттардың қандай бөлмелерде тұрып жатқандығын көрді – төсек, кішкене туммба мен ашылмайтын терезелер, яғни кішкене ғана стандартты бөлме. Түймедейді түйедей еткен... Мен ештеме ойдан шығарғам жоқ, бұл әлемдік тәжірибе", - деп түсіндірді ол.

Ол журналистерді сенсация артынан қумай, бірдеңе жазар кезде обьективті болуға және мәселені тереңірек біліп алуға шақырды.

"Қанша журналист болғанын көрдіңіз бе? Олар 40 адам болды және әр қайсысы өз сұрағын қойды. Мен журналистерден қашпаймын, бірақ сол кезде кетіп қалу керек еді деп ойлаймын қазір. Егер сен түсінбесең келіп қайта сұра, мен түсіндіріп берем. Бірақ бұлай адам сыртынан сөйлеуге болмайды", - дейді Қарақұсова.

"Жасағандары алдынан келер, басқа не айтам. Ендігіде мен жеке журналиспен ғана тілдесемін. Болды", - деп қорытындылады Қарақұсова.

Естеріңізге сала кетейік, кеше мәжілісмен Қарақұсова мемлекеттен берілетін үйге әлі қолы жетпеген әріптестерінің қонақүйдегі бір күн түнеуіне қазынадан 120 мың теңге бөлінді деген ақпаратқа қатысты пікір білдірген болатын. Ол өзі сөзінде журналистерге: «Балалар...  Сіздер тиісті деңгейдегі, құпияларға ие, қол сұғылмаушы тұлға болып табылатын депутаттардың сағаттап жалға берілетін пәтерлерде тұрғанын қалайсыздар ма?» деп дүрсе қойған еді.