Радармен тығылып тұратын полицейлер жұмыстан қуылатын болды

«Біз о бастан полицейлерге жүргізушілерден тығылмауды бұйырғанбыз. Бұл жерде сөз полицейлердің заңды іс-қимылына қатысты. Ағаштың, дуалдың, бұрыштың артында тығылып, кейін атып шығатын болса, онда біз ондай іс-әрекеттерге жол бермейміз»,- деп атап өтті И.Лепеха ҚР ІІМ-де өткен баспасөз мәслихатында.
Оның сөзі бойынша, осындай әрекеттер үшін бірқатар полиция қызметкерлері жұмыстан шығарылған. Олардың қатарында командирлер де бар.
«Атап айтқанда, біз Алматы облысында тексеріс жасадық. Нәтижесінде, бірқатар полицей атқарып жатқан қызметінен босатылды, олардың қатарында тіпті батальон командирлері де бар», - деді ол. Онымен қоса елімізде техпаспортты алу немесе алмастыру кезінде көлікті тексерту қажеттілігі күшін жоятын болды. ҚР Ішкі істер министрінің орынбасары Ерлан Тұрғымбаевтың айтуынша, бұл тек техникалық паспортты жоғалту немесе ауыстыру кезінде ғана күшке ие екен. 

«Егер де бұрын жүргізуші көліктің техникалық паспортын жоғалтып алған болса, мамандандырылған ХҚКО-ларға барып, көлігінің нөмірін, құрылғыларының сәйкестігін тексертуі міндетті еді, қазір ол тек бір өтінішпен бір күннің ішінде техникалық паспортты ала алады», - деді Е.Тұрғымбаев.