ҰҚК: "Қамауда жатқан Төлешов митингке шыққандарды қаржыландырып, билікті басып алмақ болған"

ҰҚК баспасөз қызметінің өкілі Руслан Қарасаев былай деп мәлімдеді: 

"Тергеудің мәліметтері бойынша, Төлешов мырза бұған дейін дайындық жұмыстарын жүргізген, ал өткен жылдан бері билікті зорлықпен басып алуға дайындық жұмыстарымен айналысқан. Оның әрекеттерінің жоспары елдегі жағдайды шиеленіс ошақтарын құру, наразылық акцияларын және жаппай тәртіпсіздіктерді ұйымдастыру жолдарымен тұрақсыз етуге негізделген. Бұл жағдайлармен қатар ол үкіметтің өз ойындағы баламасын жоспарлаған және қазіргі үкіметтің құрылымын өзгерткісі келген. Атырауда, Астанада, Алматыда, Оралда, Қызылордада болған жер реформасы бойынша наразылық акцияларды Төлешовтің 2015 жылдың желтоқсанында-ақ жасырын жүргізгені және қаржыландырғаны туралы дәлелдерді алдық", - деді Қарасев Бас прокуратурадағы брифингте. 
Ал ҚР Бас прокуратурасының департамент басшысы Құсайын Игембаев баспасөз мәслихатында Төлешовке есірткі заттарын заңсыз сақтау, бірқатар ауыр әрі аса ауыр қылмыс жасады деген айып тағылып отырғанын хабарлады. Олардың ішінде "кісі өлтіруді ұйымдастыру, адам ұрлау, түрлі деңгейде денсаулыққа зиян келтіру, бөтеннің мүлкін көрінеу бүлдіру, қарақшылық" қылмыстары бар.

Айта кетейік, шымкенттік белгілі кәсіпкер Тоқтар Төлешов ағымдағы жылдың 30 қаңтарында арнайы операция кезінде Шымкентте ұсталған болатын. Тінту кезінде үйінен және жұмыс орнынан қару-жарақ, есірткі заты және оқу құралдары анықталып, тәркіленген еді. Кәсіпкермен бірге үш адам ұсталды.