Шымкентте екі тұрғын велосипед ұрлауды кәсіп еткен
Шымкенттің қос тұрғыны велосипед ұрлаймын деп бастары бәлеге қалды. Бұл туралы Оңтүстік Қазақстан облыстық Ішкі істер департаментінің баспасөз қызметі хабарлады.
13 сәуір күні Шымкент қаласы ІІБ Қаратау ПБ-не «Нұрсәт» шағынауданында велосипед ұрланды деген хабар келіп түсті. Сонымен, полицейлерге белгісіз тұлғаның үй подъезінде тұрған бағасы 17 мың теңге тұратын велосипедін ұрлағаны туралы жергілікті тұрғын арызданған.
Жедел іс-шара жүргізу барысында қаланың көшелерінің бірінен ОҚО ІІД ЖПҚ жол-патрульдік полициясының қызметкерлері бірнеше велесипед тиеп, таксиге мінген екі жас азаматты байқайды. Полицейлер күдіктеніп артынан ере жөнеледі, күдіктілерді Шымкент қаласының базарларының бірінен ұстайды. Олар облыс орталығының 1978, 1982 жылғы тұрғындары болып шыққан. Күдіктілер ұрланған велосипедтерді сатып, ақшасын өз қажеттілігіне жаратпақ болған.
Тәртіп сақшылары тінту кезінде күдіктілерден ұрланған 4 велосипед тәркілейді. Сонымен қатар, жас азаматардың қалтасынан бұранда мен тістеуіш тапқан. Аталған жайт бойынша ҚР ҚК 188-бабымен «Ұрлық» қылмыстық іс қозғалды. Сотқа дейінгі тергеу амалдары жүргізілуде.
