Педофилдер туралы сайт пайда болуы мүмкін

Әлеуметтік желіде қызу талқыға түскен бұл жаңалықты желі қолданушылары жаппай құптап отыр. Кім кімге болса да айналасында кімдердің жүргені шынымен-ақ қызық. Қатыгездік қалыпты боп бара жатқан уақытта біз кейде көршіміздің кім екенін де біле бермейміз. Педофилдер туралы ақпарат жарияланатын сайт ашу арқылы еліміздің Бас прокуратурасы осынау қылмысты азайтуды көздеп отыр. «Ол сайтта «маньяктар» туралы ақпараттар базасы жасақталады. Осы тектес қылмысы үшін жауапқа тартылған тұлғалардың суреттері және олар туралы ақпараттармен кез-келген азамат танысуына мүмкіндік туады. Бұл халықаралық тәжірибеде қолданыста бар амал. Әрі оң нәтиже беріп келеді. Өйткені азаматтар хабардар болып отырады. Бізде қазір осындай заң жобасы әзірленіп жатыр»,- деді ҚР Бас прокурорының орынбасары Иоган Меркель.

Бүгінгі таңда «Педофилдерді химиялық кастрациялау» туралы заң жобасы Парламент Сенатының қарауында екенін мәлімдеген Бас прокурор орынбасары мұнымен осы тектес қылмыс толық жойылады деуге келмейді. Дегенмен, әлемдік тәжірибе көрсеткендей, азғынды азбандайтын қоғамда педофилия 60 %-дан астамға азая-тынын айтты. 

Қоса кетейік, 2015 жылдың 1-қаңтарынан бастап Қазақстанда педофилдерді өмір бойы түрмеге жабу жазасы енгізілген еді. Жазаның бұл түрі балаларға қатысты нәпсіқұмарлық әрекет жасағандарға қатысты да қолдынылуы мүмкін. Оған дейін елде мұндай азғындық үшін тағайындалатын жазаның ең ұзағы 15 жыл бас бостандығынан айыру болатын. Ал, былтырдан бастап қолданысқа енгізілген Қылмыстық кодекс кәмелетке толмағандарға қатысты сексуалды қылмыс жасағандардың жазасын ауырлатумен қоса, ондайларды шартты түрде соттауға, жазаның бір бөлігін айыппұлмен өтеуге немесе отбасылық жағдайға байланысты жазаны кейінге шегеруге, түрмеден мерзімінен бұрын босатылуына да тосқауыл қойды. Қала берді, бұл қылмыстардың мерзімі де «ескірмейтін» болды. Яғни, педофил азғындық әрекетін қанша жыл бұрын жасаған болса да бәрібір жауапқа тартылады. Дегенмен, бұл шаралар да балаларға қатысты нәспіқұмарлықты азайтпай отыр. Бір ғана 2015 жылы кәмелетке толмағандарды жыныстық қатынасқа мәжбүрлеген 465 қылмыс тіркелген. Тағы 133 қылмыстық іс жасөспірімдерге қатысты нәпсіқұмарлық әрекет жасағандарға қатысты қозғалыпты. Балаларды азғырған 101 оқиға болған. 

Осы орайда психолог мамандар қоғамға үндеу тастап отыр. Олар ата-аналарға перзенттерінің билеген немесе түрлі көз тартар қылықтары таспаға жазылған бейнероликтерді ғаламторға жарияламауға кеңес береді. Өйткені, ондай жазбалар «маньяктардың» делебесін қоздырып, қылмыс жасауына түрткі болуы мүмкін.