«Лауазым иесін жазалайтын заң жеңіл»
- Бекжігіт МӘУЛЕНОВ
Еліміздің Әділет министрлігі лауазымды тұлғаларды жазалауға келгенде «Әкімшілік құқық бұзушылық» туралы Кодекстің кей баптары осал екенін мойындады. Бұл туралы аталған құжатқа енгізілуі көзделген өзгерістер мен толықтырулар жобасы талқыланған жиында ҚР Үкіметі жанындағы заң шығару Институтының бас ғылыми қызметкері Аслан Түкиев айтты.
«Онда кейбір лауазым иелері айтылмай қалған. Ал, заңның кей нормасы лауазым иесіне емес, тек жеке тұлғаға ғана қатысты қолдануға келеді. Ол дегеніңіз – екі түрлі жаза мен айыппұл мөлшері», – деген Түкиев жаза ретінде қолданылатын санкцияларды редакциялау кезінде мемлекеттік органдарды осы мәселеге назар аударуын сұрағанын, алайда, кей мемлекеттік органдар мен баптардың көңілден шықпай отырғанын айтады. Заң алдындағы лауазымды тұлғалар мен мемлекеттік орган басшыларының жауапкершілігі қарапайым азаматтарға қарағанда ауырлау екенін айта өткен жөн. Дей тұрғанмен де жаза басқан лауазым иесіне жаза қолдану құзырлы органдардың заңдық құзыретінен жеке мәселесіне айналып бара жатыр. Әрі, тағайындалған жаза жасалған қылмысқа сай келе бермейді.
Қазір Әділет министрлігі ҚР Әкімшілік Құқық бұзушылық туралы Кодекске «өзгерістер мен толықтырулар енгізу» туралы заң жобасының жаңа нұсқасын жасап жатыр. Жұмысшы топта саланың 40 шақты сарапшысы бар. Қазіргі кезде 400-дей түзету енгізілген. Оның 60-на қатысты мамандардың ойы бір жерден шықса, қалғанының төңірегінде әлі тартыс жүріп жатыр.
- Әділет министрлігі
- Аслан Түкиев
- заң
- қызық ақпарат
