Олимпиада киімі сын көтермейді

Қазақстандық актер әрі режиссер Нұртас Адамбаевтың айтуынша тігілген киімнің түсі суық, бір қараған адамға жақсы әсер қалдырмайды. Яғни, ескі киімдерді еске түсіреді. Әлем назары ауатын дүбірлі додада Қазақстан спортшылары киімімен де көз тартып тұруы тиіс. Адамбаевтың пікірін қолдайтындар да көп. Соның бірі өзінің әлеуметтік парақшасында «Мен бұл 90-жылдары түсірілген сурет екен деп ойладым, бұл біздің құрама екен ғой», - десе, тағы бірі киім қандай болса, нәтиже де сондай болатынын болжайды.

Айта кетейік, модельдермен жұмыс бойынша арнайы комиссия құрылып, оған Олимпиада чемпиондары кірді. Жеңілатлет Ольга Шишигина спорт киіміне сын айтпады, бірақ шеруге киіп шығатын нұсқасына көңілі толмайтынын да жасырып қалмады. Оның айтуынша, олар ұсынған идеяларды өндірушілер іске асыра алмаған, сондықтан әйелдерге арналған жейдеше мен белдемшені жетілдіру керек деп кеңес айтты. Шеруге арналған форманың концепциясын компания жетекшісі айтып берді. 

Біраз жылдан бері спорт киімдерін тігумен айналысып келе жатқан компания басшылығы көпшілік тарапынан болған сынды жоққа шығара алмады. «Біз ұлттық байрақтың мотивін түстер реңіне қолданбадық. Біз басқаша істейміз. Түсі көк және ашық. Олар жақсы үйлеседі. Шалбар ақшыл сары. Аяқ киімді таңдадық. Материалы − лавсаны бар жүн. Қолайлы болуы үшін арнайы солай жасадық», −деді «Қазжеңілөнеркәсіп-Алматы» компаниясының директоры Айбек Бектұрғанов.

− Сынға келер болсақ, мен бір мәселені түсіндім, он адам, он пікір. Бірінші нұсқасы ретінде олар көйлекті таңдады, енді оларға ұнамай қалды... Екіншісі жақсырақ екен. Қазір енді өзгертеміз». 

Айта кетейік, Рио-де-Жанейродағы жазғы Олимпиада ойындары 2016 жылдың 5-21 тамызы аралығында өтеді.