22 мыңнан астам жамбылдық тұрғын жұмыспен қамтылмақ
- Жансая ТӘУЕКЕЛҚЫЗЫ
Жамбыл облысында 22 мыңнан астам жергілікті тұрғын жұмыспен қамтылады. Бұл туралы ҚР Президенті жанындағы Орталық коммуникациялар қызметінің өңірлік филиалында өткен брифингте облыстық жұмыспен қамтуды үйлестіру және әлеуметтік бағдарламалар басқармасының басшысы Жорабек Баубеков мәлім етті.
Басшының айтуынша, 2014 жылдан бері аймақта «Өрлеу» пилоттық бағдарламасы енгізіліп, нәтижесінде шартты ақшалай көмек тағайындалып келеді. Өткен жылы бағдарлама аясында 1788 отбасындағы 9694 адамға 420,3 млн теңге көлемінде қаржылай көмек берілген. Ол отбасылардың жұмыс жасындағы 2235 азаматы әлеуметтік қолдаудың белсенді түрлеріне тартылды. 403-і ақылы қоғамдық жұмыстарға, 118-і жастар практикасы бойынша, 169 адам әлеуметтік жұмыс орындарына орналастырылған. Нәтижесінде былтыр табысы кедейлік шегінен төмен жамбылдық тұрғындар саны 0,4 пайызға кеміген. Жоспар бойынша өңірде 2018 жылдан бастап заңды түрде көпбалалы және әлеуметтік жағдайы төмен отбасыларға берілетін төлемдер жаңа форматта төлене бастайды.
«2015 жылдың қорытындысы бойынша екі қолға бір күрек іздеген 26256 адам жұмыспен қамтылған. Оның 17 642-сі тұрақты жұмысқа орналасса, мерзімдік жұмыс орындарына 1146, ақылы қоғамдық жұмыстарға – 3574, әлеуметтік жұмыс орындарына – 1096, жастар практикасына - 1394 адам жіберілген, кәсіптік оқытуға 702 адам жолданса, 402 адам микрокредит алды»,- дейді Жорабек Нұрмергенұлы.
Биыл жыл соңына дейін 22 мыңнан астам жамбылдық тұрғынды жұмыспен қамту жоспарланып отыр. Оған қазынадан 11,7 млрд теңге қарастырылып та қойған. Оның 4 млрд теңгесі бір ғана «Жұмыспен қамту-2020» бағдарламасына жұмсалады.
- Жұмыспен қамту
- Жамбыл облысы
- тұрғын
