Тұрғындар алғыстарын жазып, талға ілді
- Жансая ТӘУЕКЕЛҚЫЗЫ
Жамбыл облысының орталығы Тараз қаласында Алғыс күні жоғары деңгейде өтті. Айтулы датаға орай жұртшылық «Достық» алаңына жиналды. Оған облыс әкімі Кәрім Көкрекбаев қатысып, жұртшылықты мерекемен құттықтады.
Елімізде тұңғыш рет тойланған мерекелік шара «Мен алғыс айтамын!» атты флеш-мобпен басталды. Соңында оған қатысқан жастар «Тәуелсіз еліме рахмет!» деген ұранмен көкке шарлар ұшырды, деп хабарлайды облыс әкімдігінің баспасөз қызметі. Салтанатты шара театрландырылған қойылыммен жалғасқан. Көріністе түрлі ұлт өкілдері қазақ жеріне қалай қоныс аударғандарын айтып, қонақжай қазақ халқының құшақ жая қарсы алғанын еске алып, жұртшылыққа алғыстарын айтты. Қаланың өзге тұрғындары қағазға өз алғыс-тілектерін жазып, оны алаң ортасына орнатылған ағаш бұталарға ілді.
Мерекелік шара жоспарына сәйкес Таразда «Ата-анам – алтын тұғырым», «Әкем мен анама мың алғыс» көрме-байқауы, «Отбасы – қоғам тірегі» қойылымы ұйымдастырылды.
- Тараз
- Алғыс күні
