ОҚО зейнеткерлері қоғамдық автобуста тегін жүретін болды

Оңтүстік Қазақстан облысының зейнеткерлері қоғамдық автобустарда тегін жүру мүмкіндігін алды. Тек бір күн ғана. Яғни, 1 наурыз – Алғыс айту күніне орай осындай қайырымдылық шарасы қолға алынып отыр. Бұл туралы «Южавтотранс» қауымдастығының төрағасы Дархан Қаюпов хабарлады. Төрағаның айтуынша, бұл дата - барша қазақстандықтар үшін ортақ мереке.

«Біз Елбасы Жарлығымен қолға алынған мерекеге орай көлік компаниясындағыларға зейнеткерлерді тегін алып жүру туралы ұсыныс айттық. Жігіттер қолдады. Енді 1 наурызда көлік компаниясының қызметкерлері тарапынан зейнеткерлерге деген құрмет еселене түседі. Тіпті олар зейнет жасындағы жолаушыларға тілектер айтып, қызмет көрсететін болады»,-деді Д.Қаюпов. Тек жолаушылар зейнеткерлік туралы куәлігін көрсетуі тиіс.

Айта кетейік, былтыр Елбасы Н.Назарбаев Қазақстан халқы Ассамблеясының 20 жылдық мерейтойына орай   1 наурызды Алғыс күні деп атап өту туралы Жарлыққа қол қойған. Биыл бұл мереке елімізде кең көлемде алғаш рет атап өтілгелі отыр.