Шаруалар егіс жұмыстарына толық дайын

Жоспар бойынша көктемгі егін 460,6 мың гектар жерге егіледі. Бүгінде алқаптың 375 мың гектары айдалып, жаздық дақылдардың тұқымымен қамтамасыз етіліп қойды. Көктемнің алғашқы күніне дейін өңірдегі егіс алқабының 4,6 мың гектарына көкөніс, 2 мың гектарына масақты дәнді дақыл, 0,6 мың гектарына жоңышқа мен 0,1 гектарына картоп егілген. 

Ауыл шаруашылығына қажетті техникалар: 18 мыңнан астам трактордың – 87 пайызы, 3 мыңға жуық трактор соқаларының - 95 пайызы, 2 мың дән сепкіш техниканың 90 пайызы барлық тексеру жұмыстарынан өткен. 

Көктемгі дала жұмыстарына 38 мың тонна дизель отыны бөлінген. Мамандардың айтуынша, бұл отын егіс жұмыстарына толығымен жетеді. Тағы бір атап өтетіні, ауыл шаруашылығы дақылдарын күтіп-баптау үшін 15 мың тонна тыңайтқыш қоймада сақталған. Оның басым көпшілігі Сарыағаш ауданында. Айта кетейік, биыл аймақта көктемгі және күзгі ауыл шаруашылығы дақылдарының егіс көлемі былтырғымен салыстырғанда 400 гектарға артқан. Нәтижесінде 772,8 мың гектар алқапқа егін егілмек.