Имамдар мешітті паналап отырған жалғызбасты ананы 5 баласымен бірге қуып жібермекші

Алланың үйін жылға жуық мекен етіп келген атыраулық көпбалалы ана енді көпшіліктен көмек сұрауға мәжбүр. Өйткені, тұрып жатқан бөлмесін имамдар өз мақсатында пайдалану үшін келіншектен сыпайы түрде босатуды сұрапты. Ешқандай табыс көзі жоқ отбасы баспана кезегінде тұр. Бірақ ол кезектің қашан жетері белгісіз. Мешітке келген қайырымды жандардың садақасы мен мемлекеттен берілетін жәрдемақыға жан сақтап отырған ана мен балалардың басқа барар жері жоқ. Бұл туралы КТК арнасы хабарлады. 

Шынаргүл Нұршаханованың тұңғышы – 10 жаста, кішісі – 3-те. Екеуі қала сыртындағы мектеп-интернатта оқиды. Бірақ жағдайдың жоқтығынан сабақтан көп қалады. Ал мектеп жасына жетпегендері үйде. Дін жолында жүрген жолдасы аяқ асты өзгеріп, отбасынан тастап кеткен екен. Ақырында істі болып, сотталып шыққан. Тіпті туған ата-әжесінің де немерелерін көргісі жоқ. Шынаргүлден өзінің тума-туыстары да теріс айналған.

-Туыстарым бар, Жаңаөзенде, Ақтауда тұрады олар. Оларға барайын десем, олар да «кет-кет» деп қуады. Қазір өз күнін өзі көреді, ешкім ешкімді асырауға тиісті емес" - деді 5 баланың ана. 

Өкінішке қарай, жергілікті биліктен де қайран болмай тұр. Баспана кезегіне тұрғанымен, қуанышты күннің қашан туары белгісіз. Өйткені Шынаргүл Нұршаханова көпбалалы отбасы ретінде 2015 жылдың 27 қаңтарынан бастап тізімге тіркелген. Қазір реттік саны – 3824. Тұрғын үй мәселесі кезегіне сәйкес қаралады. 

Абақтыдан жаңа шыққан жұбайы бес баласына алимент те төлемей қашып жүр. Бәрінен күдер үзген келіншек енді қайырымды жандардан ғана көмек күтіп отыр.