Таңғажайып «магнит» бала

Жақында ғана ұлдарының ерекшелігін білген ата-анасы әліге дейін аң-таң көрінеді. Ал немересінің бойындағы бөлек дүниені қария ерекше таңқалыспен есіне алады. Үйде отырған ақсақал теледидардан бір шалдың үстіне темір-терсектерді жабыстырып жатқанын көреді. Жанында жүрген немересінен қасық әкелуін өтініп, соны өз денесіне жақындатып, теледидардағы әрекетті қайталамақ болады. Бірақ онысынан ештеңе шықпағанына қынжылған қарт жанында ойнап жүрген баласының кеудесіне қасықты қойғанда не істерін білмей абдырап қалады. Өйткені немересінің денесі қасықты өзіне тартып тұрғанын көргенде ол өз көзіне сенбепті. Бастапқыда бір шетінен қатты қорыққан Нұрдәулеттің отбасы дереу дәрігер мен психологтың көмегіне жүгінуді жөн санаған. Тек мамандар одан балаға төнер қауіп жоғын айтқанда барып жандары жай тауып, сабаларына түсіпті. 

Сол бір тосын оқиға туралы кейіпкеріміздің өзі: «Атам қасық әкел деді. Әкеліп бергенімде атама емес, маған жабысты. Сосын атам мұны бәрін шақырып айтты»,-дейді 24.кз арнасына берген сұхбатында. Қазір даярлық тобында білім алып жүрген Нұрдәулет Арыстанбек есейгенде ғарышкер болуды армандайды екен. Алғашында оның кеудесіне тек бір қасық қана жабысқанымен, 10 күн өткенде тартылыс күші едәуір ұлғайған. Бүгінде оның денесі алты қасықты немесе үш бірдей ұялы телефонды ұстап тұра алады. Сондай-ақ, баланың кеудесіне кәдуілгі үлкен планшет те жабысады екен. 

Естеріңізге сала кетейік, соңғы жылдары мұңдай ерекше қабілеті бар жандар саны артып келеді. Солардың қатарында оралдық Қарлығаш Нығметова да бар. Тіпті оның аты осы қабілетінің арқасында әлемдік Гиннестің рекордтар кітабына енген екен. Бұдан өзге Талдықорған өңірінде үш жасар Қызғалдақ есімді бүлдіршініміз де осындай қабілетке ие. Оның да денесіне бастапқыда бір қасық, қазір алты қасыққа дейін жабысады екен.