Осы аптаның сәрсенбісінде Оңтүстік Қазақстан облысының әкімі Жансейіт Түймебаев Қазақстан Республикасы Тәуелсіздігінің 25 жылдығына орай өңірдегі бірқатар бұқаралық ақпарат құралдары өкілдерінің басын қосып, ынтымақты ұран, татулықты ту еткен бейбіт халқымыздың ұлық мерекесімен құттықтады.

Жаңа оқу жылында тағайындалған бір ауданның №1 мұғалімі өз «саясатын» жүргіземін деп жүріп кейбіреулерге жақпай қалыпты. Жақпағаны сол, қит етсе білім бөлімін кінәлап шыға келетіндер таяуда болған келеңсіз жағдайға да бас мұғалімді кінәлап жүрген көрінеді.

Оңтүстіктегі курортты аудандардың бірінде көгілдір отынға деп бөлінген ақша «адасып», басқа мақсатқа жаратылып кетіпті. Биылғы жылдың соңына дейін көмір жағудан құтыламыз деп отырған ауыл тұрғындары бұл жайсыз хабардан кейін ауданның №1 басшысына деген өкпесі қара қазандай болып, оны қалайда құртудың амалдарын қарастырып жүр екен.

«Нұр Отанның» облыстағы филиалына «первый зам» болу да екінің біріне бұйыра бермейді. Таяуда болған әкім тағайындаудан кейін ОҚО-дағы осы бір жайлы кресло босап қалды. Төрағаның 1-орынбасары болуға таласып жүргендер бүгінде «жарыс жолына» түсіп кетіпті.