Қыдырәлі Болманов Жанар Айжанова екеуі арасындағы құпиямен бөлісті

 «Осыдан мың жыл бұрын… Былай қарасаң, күні кеше… Екеуміз де студентпіз… «Құласаң – нардан құла» деп мен Халықаралық «Азия дауысы» байқауын жоспарлап жүрген кезім, ал Жанар аты Алты Алашқа жайылған, (рейтингі) «танымалдылық» деген сұмдық рекорд ұрып тұрған кездер… Ол кезде қала ма, аудан ба, ауыл ма, бәрібір, күніне 3-4 концерт… Қанша концерт болса да адам сыймай, атақты «Битлз» тобы келгендей билет таппай, абыр-сабыр болып жататын Жанардың (кейде тырысып қалатыны болмаса) мінез-құлқы, сөз шалысы, ашық-жарқындығы, ибалы, имандылығы, ақылы, білімі – тектілігі болар, Жанармен таныса сала достасып кеттік…» - деді пост авторы. Әрмен қарай продюсер Айжанова екеуі бір концерттерде өнер көрсеткен шақтары туралы сөз өрбітті.

«Содан бір күні Жанар «концерттерге менімен бірге жүрші, әрі ұйымдастыру жағынан қажетсін» деп, Жанар демалып, киімін ауыстырғанда мен сахнада гитарамен бірнеше ән айтатынмын… Жанар концерттің екінші бөлімін айтып жатқанда есеп-қисабын жүргізіп, бәрін хаттап, қағаздап қоятынмын... Қонақүйде бір үлкен нөмірге екеуміз бірге түнеп, түнімен «видик», небір Шварцнеггер, Брюс Ли, Джеки Чан деген нешетүрлі «киноларды» қарайтынбыз… Таңды таңға ұрып… Соны қарап отырып, кейде құшақтасып ұйықтай салатынбыз… Бірақ қасымда қыз бала жатыр-ау, былай қылсам қалай болады деп бірде-бір рет басымды қатырмаппын… «Бота көзін сүзбесе, буыршын бұйдасын үзбейді» деген… Сен де көзіңді сүзбепсің… 2 жылдан астам бірге жүрдік, ақ адал бір нанды бөлісіп жедік. О, Алла, жасымыз жасымыз жалындаған жиырманың о жақ, бұ жағы… Соған қарамай, ардан аттамадық, арамызда адалдықтан өрбіген абырой қалды. Алла куә! Бұл да бір бақыт екен…» деп ой бөліскен Болманов. Қарақат Әбілдинаның жолдасы өз сөзін Жанар Айжанова екеуінің арасында қарым-қатынас кейінгі жастарға үлгі болсын деген оймен жазғанын атап өтіп, туған күн иесіне  «Сенде бәрі бар, мінез де, жан-жақты талант та, ақындық та, композиторлық та, Алла сақтасын, ел шетіне жау тисе, әйелмін деп қарамай, қолыңа найза алып, тікелей жауға шабар батырлық та бар… Ар да бар, ұят та бар, иман да бар! Ең бастысы, «Өнер алды — қызыл тіл» дейтін қазақпыз сөзден түйін түйетін шешендік қасиетіңді ерекше бағалаймын. Алла осының бәріне бақыт, ұзақ ғұмыр, екі өмірдің абыройын қосып берсін! Игі ниетпен: досың Қыдырәлі Болманов+Қарақат Болманова» деп жазды.