ОҚО-да жанайқайын айтқан тұрғынның ағасы ішімдік салдарынан қайтыс болған
Оңтүстік Қазақстан облысы әкімінің есепті кездесуінде жиын тарқағанына қарамастан жанайқайын тыңдауды өтініп, «өтінішімді тыңдамаса, залдан шықпаймын» деп тұрып алған шымкенттік тұрғынның мұңына аймақ басшысы құлақ асты. Тұрғын осыдан алты жыл бұрын орын алған оқиғаны еске алып, әкімнен араша түсуді өтінді. Айтуынша, 2010 жылы өмірден озған ағасының өліміне кінәлілер әлі күнге дейін бостандықта жүр. Облыстық Ішкі істер департаментінің баспасөз қызметі бұл жағдайға қатысты мәлімдеме жасады.
«2010 жылдың 21 ақпанында Сайрам ауданы Ақсукент елдімекенінде орналасқан кәсіпорын аумағынан 1969 жылғы ОҚО тұрғыны Г.Алимбетовтің мәйіті табылған.
ОҚО ІІД Тергеу басқармасы қызметкерлерімен жүргізілген тергеп-тексеру жұмыстары барысында аталған кәсіпорын маңындағы кафенің бірінде жәбірленуші өзінің достарымен бірге спирттік ішімдік ішкенін анықтаған. Облыстық сот-медициналық сараптама қорытындысы жәбірленушінің өлімі көп мөлшерде алкогольді ішімдік ішіп, денесі үсік шалуынан қайтыс болғанын көрсеткен» делінген мәлімдемеде.
Қайтыс болған азаматтың заңды өкілдері тарапынан бірнеше рет шағым түсіріліп, тіпті эксгумация жасалып, сот-медициналық сараптамадан үш рет өткізілген. 2015 жылдың 21 желтоқсанында Астана қаласында қосымша комиссиялық сот-медициналық сараптамасының қорытындысы алғашқы сараптама нәтижесін растаған. Сөйтіп барлық сараптамалар нәтижесі мен жинақталған мәліметтер негізінде бұл жағдайда қылмыстық әрекеттің болмауынан іс қысқартылған.
- ЮКО
- Бейбут Атамкулов
- ОҚО
- Бейбіт Атамқұлов
- қызық ақпарат
