Төрт ай театрда тұрған режиссер үйлі болды

Осыған дейін театрдың гримдеу бөлмесінде 4 ай өмір сүрген режиссердің жағдайын жақында «Әйел сыры» спектаклінің премьерасына келген әкімге театр басшысы мен қызметкерлері айтқан көрінеді. Осы жолы мұны аяқсыз қалдыр-мауға уәде берген облыс басшысы сөзінде тұрып, көп ұзамай оны арнайы қабылдап, құттықтапты. 

Отыз жылдан бері еліміздің мәдениет саласына үлес қосып келе жатқан Қуандық Қасымов мырзаның жасы бүгінде елу үште. 1984 жылы Жамбыл облысы қазақ драма театрынан өз жұмысын бастаған ол биыл ОҚО-да «Абылай ханның арманы» атты спектакль қойыпты. Режиссердің айтуынша, осы қойылымнан кейін облыстық мәдениет басқармасының басшысы Күлия Сымайылханқызы мен театр директоры Қалтөре Жұмағұлов оны жұмысқа шақырып, тамыз айының төртінде театрдың көркемдік жетекшісі қызметіне тағайындаған. Содан бері ол Сәбит Досановтың «Тозақ шеңбері», Абай Құнанбаевтың «Желсіз түнде жарық айы» мен Б.Әбдіразақовтың «Әйел сыры» атты спектакльдерін қойған.

Жаңа пәтеріне қоныстанып жатқан ол: «Облыс әкімінің бұл тартуына ие болуымды театрдың мәртебесінің арқасы деп білемін. Отбасымызбен өнердің басы-қасында жүрміз. Әйелім де Жамбыл облысындағы драма театрдың әртісі. Өнерде жүрсе де төрт ұл, үш қызды өмірге әкеліп, алтын алқа иегері атанды. Екі немерем бар. Балаларымның алды үйлі-жайлы болса, кішілері әлі мектепке барады. Таразда да үйіміз болған, қиналғанда сатып жібердік қой. Қазір енді бәрі бір ұлымның үйінде тұрып жатыр. Осы балаларымның несібесі шығар. Алла қаласа, жазға таяу отбасымды осында алып келу ойымда бар»,-дейді. 

Естеріңізге сала кетейік, театрда сахналатын қойылымдарға аса талғампаздықпен қарауды, барлық жанрлар бойынша көркем идея таба білуді мықтап меңгерген режиссер осыған дейін М.Байжиевтің «Құдалар», Ш.Айтматов пен М.Шахановтың «Сократ түні», Е.Әлімжановтың «Жанұран», Д.Исабековтың «Пері мен періште», Ш.Мұртазаның «Ноқтаға басы сыймаған» сынды пьесаларын қойған. 

Сондай-ақ ол 2006 жылы «Ерен еңбегі үшін» медалімен, Қырғызстан Республикасының «Мәдениеттің мықты қызметкері» төс белгісімен марапатталған. Ал 2007 жылы «Қазақстан ардагерлері» кеңесінің шешімімен Бауыржан Момышұлының рөлін үздік сомдағаны үшін «Батыр шапағаты» медалін иемденген.