Әкімдік жағалап жүретін ұзынқұлақтардың айтуынша, Шардараның әкімінің басына бөтелке тиіп, жұлдыз санап жатқан кезде қолын айқастыра көкірегіне қойып, күліп қарап тұрған бір үлкен кісі ОҚО-ға жаңа әкім келісімен әлгі таяқ жеген әкімнен барып кешірім сұраған көрінеді.

Өткенде Оңтүстіктің жаңа әкімі тағайындалғанда ОҚО мәслихатының кейбір депутаттары шәпкісін аспанға атып, «өзіміздің жерлес келді» десе, тағы біреулері «жасасын Түймебаев!» деп айқайлаған көрінеді. Мұны ұзынқұлақтардан естіген жоқпыз, «Рател.кз» дейтін интернет басылым жазған болатын.

ОҚО-ға жаңа әкім тағайындалғаны сол екен, енді біраз дөкей жылы орнынан қозғалып, басқа бір орындарға ауысып қалуы ықтимал. Ұзынқұлақтан естуімізше, басқа жаққа кетуі мүмкін кісілердің ішінде облыс әкімінің бір «замы» да бар екен. Қызметімізге кейбір ұқсастықтарымыз кесірін тигізуі мүмкін деді ме, әйтеуір тойған қозыдай томпиып отырған замәкімге «таяуда бір жаққа кеткенің дұрыс-ау» дейтін әңгіме айтылыпты-мыс.

Осыдан 3 жылға жуық уақыт бұрын Кәрім Көкірекбаев Жамбыл облысына әкім болып тағайындалғанда өңір жұртшылығы ол туралы «Жамбыл циркіне директор болатын-ақ адам еді» деп күбір-сыбыр ете қалған-тын. Өкінішке қарай, содан бері халықтың көзқарасы пәлендей өзгере қоймапты. Оның үстіне әкімнің де өз жерлестерінің көзіне әдемі көрінуге күш салып, абырой-беделін арттыруға тырмысып жатқаны да шамалы сияқты.