«Дольщик» атанбай тұрып, жақсылап ойлан

«Бас прокурор ретінде үлескерлік құрылысқа ақша салмас бұрын екі құжатты талап етуге кеңес беремін. Ол кепілдік қоры мен жергілікті әкімдіктің келісімшарты. Міндетті түрде оларды талап етіңіз. Құжатты мұқият оқыңыз. Бірақ құжат жалған болуы мүмкін. Ең дұрысы, әкімдікке келіңіз немесе ресми сайттан тексеріңіз. Ақпаратты ulesker.kz cайтынан да алуға болады», – деді ол.

Жақып Асановтың айтуынша, соңғы жылдары жауапсыз құрылыс компаниялары мен алаяқтардың заңсыз әрекеттерінен 9 мыңнан астам азамат зардап шеккен, 59-дан астам нысанның құрылысы аяқталмай қалған.

Осы жағдайды ескере келе, ҚР Бас прокуратурасы мен ҚР ІІМ «Тұрғын үй құрылысына үлескерлік қатысу туралы» заң жобасын жасаған. Алқа мәжілісі барысында Асанов аталмыш заңның арқасында елімізде үлескерлер мәселесі толығымен шешіледі деп сендірді.

«Біз алдымызға мақсат қойып отырмыз. Яғни жыл аяғына дейін үлескерлерге қатысты істер толығымен сотқа жетуі керек. Біз осыған бар күшімізді жұмылдырып отырмыз. Негізгі салмақ ішкі істер органдарына түседі», – деді Бас прокурор.

Сонымен қатар, Жақып Асанов «Прокурордың 100 кеңесі» атты мобильді қосымшаның пайдасы туралы айтты.

«Өңірлердегі прокурорларға тапсырма берілді. Біз әрбір үйге, әрбір пәтерге кіруіміз қажет. Әрбір қазақстандықтың білуге құқығы бар. Егер біреу білмесе, ол біздің кінәміз. Біз – мемлекетпіз. Ол біздің міндетіміз. Адамдарды қызықтыра білуіміз керек. Олар өз құқығын қорғауға қатысты барлық ақпаратпен қамтамасыз етілуі қажет. «Прокурордың 100 кеңесі» жобасы барлық мәселені шешпейді. Дегенмен, өзекті мәселенің алдын алуға көмектеседі», – деді Бас прокурор.