Тумаған сиырдың уызына талас науқаны басталған сияқты...
ОҚО-ға жаңа әкім тағайындалғаны сол екен, енді біраз дөкей жылы орнынан қозғалып, басқа бір орындарға ауысып қалуы ықтимал. Ұзынқұлақтан естуімізше, басқа жаққа кетуі мүмкін кісілердің ішінде облыс әкімінің бір «замы» да бар екен. Қызметімізге кейбір ұқсастықтарымыз кесірін тигізуі мүмкін деді ме, әйтеуір тойған қозыдай томпиып отырған замәкімге «таяуда бір жаққа кеткенің дұрыс-ау» дейтін әңгіме айтылыпты-мыс.
Мұны естіген замәкім «мені алысқа жібермей, Шымкенттің әкімі ете салыңызшы» деп, өтінген көрінеді. Жалпы, жаңа әкім келгелі «Шымкенттің мэрі келген жағына кетеді» екен дейтін әңгіме шыға бастаған. Тіпті облыс әкімдігінде жоғары қызметте отырған жауырыншылар «Әбдірахымов қазанның 15-30 аралығында әкімдікті босатып береді» деп, пал ашып та үлгеріпті. Соған қарағанда тумаған сиырдың уызына талас науқаны басталып кеткен сияқты. Кім біледі, кеткісі келмеген адамды кетіргілері келіп те жүрген шығар. Билікте жүргендердің неше түрлі интригаға баратыны үйреншікті болып кеткен заман емес пе?! Әйткенмен, Әбдірахымов жерде қалмасы анық. Не бір облыстың әкімі, не бір министрліктің тізгінін қолына алып жатса, ешкім таң қалмас...
- әкім
- ОҚО
- шымкент
- Ғабидолла Әбдірахымов
- қызық ақпарат
