ОҚО-да қатты дауыл шатырын жұлып әкеткен үйлерді депутаттар жөндеп беріп жатыр (фото)

Бұл жағдай отырарлық жұртшылыққа ауыр тиді. Алайда үйлеріне зақым келген жерлестерін көрген жергілікті тұрғындар қолдарынан келгенше көмектерін беруге білек сыбана кірісіп кетті. Алғашқылардың бірі болып депутат Асан Аралбай өз қаржысына құрылыс материалдарын алып, үйлерді жөндеу жұмыстарын жүргізіп жатыр.  Депутат Аралбай бұған дейін өзінің иелігіндегі сауда орнында аптаның әр жұмасында тегін нан таратып, халықтың алғысына бөленіп үлгерген азамат. 

Желдің құрсауында қалған үйлерді жөндеуге еріктілер тобы да көмек қолын созып жатыр. Тіпті жұмысшы топ шелектеп құйған жауынға қарамастан жөндеу шараларын жалғастыруда. Айта кетейік, бүгін аудан әкімі Ерлан Айтаханов табиғи апаттан ең көп зиян көрген Мөлке Шойманов ауылында болды. Аудан басшысы алдымен қатты соққан дауылдан шатырын ұшырып әкеткен отбасылардың үйлерін аралап шықты. Мұнан соң аудан басшысы ауылдың қалталы азаматтарын мемлекетке қол қусырып қарап отырмай, жәрдем беруге шақырды.

 14 маусым күні сағат 22:30-23:25 аралығында ОҚО аумағында жылдамдығы 25-30 метр болатын күшті жел Отырар, Бәйдібек аудандары мен Түркістан қаласындағы 300-ден астам тұрғын үйлер мен әлеуметтік нысандардың шатырын ұшырып, ағаш және электр бағаналарына зиян келтірген болатын. Салдарынан Отырар ауданныда жарық түгелімен өшірілді. Оқиға орнына аймақ басшысы Бейбіт Атамқұлов  барып, тұрғындармен кездесті. Арнайы комиссия құрылып, келтірілген шығын есептеліп жатыр.