ОҚО-да үздік дәрігерлер марапатқа қарық болды

«Адам өмірін ұзартуға септігін тигізетін ақ халатты абзал жандардың еңбектерінің өте зор екені барша жұртшылыққа мәлім. Алдағы уақытта да денсаулық сақтау ісін тиімді ұйымдастырып, халыққа көрсетіп отырған дәрігерлік көмек көлемі мен сапасын жақсартуды жоғары нәтижемен атқаратындарыңызға сенімдімін», - деді  аймақ басашысы Атамқұлов.

Шара аясында аймақ басшысының медалімен және облыс әкімі мен облыстық мәслихат хатшысының құрмет грамотасы және Алғыс хаттары сынды сый-сияпаттармен 30-дан астам дәрігер марапатталды. Солардың ішінде облыстық балалар ауруханасының кардиохирургия бөлімінің меңгерушісі Алмат Байсалов, Шымкент қалалық жедел жәрдем стансасының желілік бригадасының дәрігері Гүлбала Минасилова мен Шымкент қалалық жедел медициналық көмек көсрету ауруханасының дәрігер-хирургі Жорабек Сүйгенбаев "Облысқа сіңірген еңбегі үшін" медаліне ие болды. Әнуарбек Маймақов басшылық ететін облыстық балалар ауруханасы "Үздік медициналық ұйым" номинациясына қол жеткізді. Салтанатты жиын соңы мерекелік бағдарламаға ұласты.

Айта кету керек, облыста 7303 дәрігер мен 22368 медициналық бикелер жұмыс істейді. Соңғы жылдары өңірде кадрлар тапшылығы 2 есеге, ауылдық жерлерде 2,5 есе төмендеді. Медициналық мамандардың қайта даярлау және біліктілігін арттыруға облыстық бюджеттен жыл сайын 300 млн. теңгеден астам бөлініп, 10 мың маман білімін жоғарылатуда.

Тәуелсіздік алған ширек ғасырда Оңтүстік Қазақстан облысында жаңадан 347 денсаулық сақтау нысаны салынса, оның 8-і «100 мектеп, 100 аурухана» бағдарламасы бойынша бой көтерген. Медициналық ұйымдардың материалдық техникалық базасының жарақталу көрсеткіші 65%-ды құрап, республикалық орта көрсеткішке қол жеткізілді.