Әр жаңа жыл келген сайын инфляцияға орай зейнетақы мен басқа да әлеуметтік төлемдерге үстеме ақы қосылып отыратын. Осы жолы да 2017 жылдың қаңтар айынан бастап бюджеттік төлемдерге үстеме қосыла ма?

Ауылдық жерде тұратын көптеген ата-аналар 4 баладан бастап көпбалалы деген мәртебеге ие болып, арнаулы жәрдемақыға үміт арта алатынын біле бермейді. Оған редакциямызға келіп түскен көптеген хаттар арқылы көз жеткізуге болады. Өйткені, бұрынырақта аналар көпбалалы деген мәртебеге 6-7 баладан кейін ғана ілігетін.

Көпбалалы аналар үшін мемлекет тарапынан берілетін жәрдемақының жөні бөлек. Бала тәрбиесімен үйде отырған жас ана әлеуметтік жағдайына байланысты әр тоқсан сайын тиісті жәрдемақысын алып отыруы керек. Бірақ, бізде мемлекет тарапынан беріліп жатқан жәрдемақының өзін құдды қалтасынан беріп жатқандай қызғанатын мемлекеттік қызметкерлер бар. Төрт-бес тауығы бар екенін сылтауратып тізімнен сызып тастайды. Қолына «бірдеңе» қыстырмасаң ары-бері жұмсап, әуре ететіндерді де естіп жүрміз. Әупірімдеп күн кешіп жүрген мұқтаж жанды қалайда жәрдемақыдан қаққысы келетіндердің бұл әрекетін мемлекет ақшасына жаны ашығандықтан осылай етеді десеңіз, қатты қателесесіз. Үш айда бір берілетін жиырма мың теңгеге ортақтасып, «доля» дәмететіндер бар. Ана мен баланың қамқорлығы үшін берілетін жәрдемақыға көз аларту, қалайда жырымдап жеу – барып тұрған бейшаралық, опасыздық емес пе?!

Таяуда Парламент Мәжілісінің жалпы отырысында палата депутаттары «Төлемдер және төлем жүйелері туралы» заң жобасын екінші оқылымда мақұлдады. Бұл жолы депутаттар аса дауласып, даурыққан жоқ. Қаржы және бюджет Комитетінің мүшесі Дания Еспаева құжатта азаматтардың берешегін әлеуметтік төлемдер мен мемлекет тарапынан тағайындалған жәрдемақы есебінен өндіруді шектеу нормалары қаралғанын айтты. Одан бөлек, қарызды балаларының білім алуға ақша жинақтайтын депозиттердегі ақшадан да өндіруге жол берілмейтін болады.