Қазақстанда жыл өткен сайын бай мен кедейдің арасы алшақтап бара жатқанын ешкім жоққа шығара алмас. «Кедей «бай болсам», бай «құдай болсам» деп армандайды» деген мәтелдің тек байшыкештерге қатысты бөлігі ғана өз күшінде сияқты. Ал сіңірі шыққан байғұстың армандамақ түгіл, бай болу түсіне де кірмейтін шығар. Иә, жер бетінде байлар мен кедейлер арасындағы алшақтық ХХІ ғасырда ең жоғарғы шегіне жетіп, әлемдік деңгейде ең түйткілді мәселеге айналғандығы ресми түрде мәлімделді. Және аталмыш тақырып Батыста Томас Пикеттидің «ХХІ ғасырдағы капитал» атты кітабы жарыққа шыққаннан кейін қызу талқыға салына бастағаны да белгілі. Автордың айтуынша, қазіргі капитализм – ауқаттылардың заманы. Олар байыған үстіне баюда. Соның салдарынан әлеуметтік теңсіздік өршіп, бұл құбылыс экономикалық өсімге кері әсер етіп отыр. «Біздің бүкіл тарихымыздағы капитал теңсіздіктің тереңдеуіне негізделіп келген. Бұл үрдісті түсіндіру оңай. Үнемі толығып жатқан байлық ғаламшардағы халықтың 1 пайызының ғана қолына жинақталуда. Бұл өз кезегінде кірістің өсіп, шығыстың азаюына алып келеді. Қаржыға қатысты ең басты түйткіл – осында» дейді ол.

Ең төменгі күнкөріс деңгейі дегеніміз – адамның ең төменгі ақшалай табысы. Ал, кедейлік шегі – адамның ең мұқтаж қажеттіліктеріне ғана жететін қаражат. Осы қазан айында ғана ranking.kz сайты еліміздегі ең төменгі күнкөріс деңгейі туралы деректер жариялады. Бүгінде еліміздегі ең төменгі күнкөріс мөлшері 23 191 теңгеге тең. Ең жоғары көрсеткіш – Маңғыстау облысына (28 785 теңге) тиесілі болса, ең төменгісі – Жамбыл облысында (20 581 теңге) тіркеліпті. Тұтынушы бағаларының индексі өткен жылмен салыстырғанда 116,6%-ды құрап отыр.

Ақ пен қараның, аласа мен биіктің, ұзын мен қысқаның қатар жүретіні сияқты қай қоғамда да бай мен кедей бірге өмір сүрген. Кешегі кеңес идеологиясы қанша жерден кедейлердің мүддесін қорғағансып, байларды жек көрінішті етіп көрсеткісі келсе де бай мен кедей ол кезде де болды. Бірақ қазіргідей емес-тін. Ал, бүгінгі демократиялық қоғамымызда екі таптың арасы кәдімгідей алшақтап кеткен. Тіпті, немен өлшеріңді білмейсің...