Индустрияландыру аясында іске қосылған 20 жоба тоқтап тұр
- Жан КЕНЖЕ
«2016 жылғы 1-ші жартыжылдық қорытындысы бойынша Индустрияландыру картасы жобаларының 70 пайызы (600 жобадан астам) жоспар бойынша жұмыс істейді, 20 жоба тоқтап тұр. Бұл іске қосылған барлық жобалардың 2 пайызы. Жобалардың тоқтап тұруының себебі – нарықтың азаюы, айналым қаражаттарының болмауы, өндірілген өнімнің бағасының құбылмалылығы»,- делінген министрлік жауабында.
Ведомство ақпаратына сәйкес, тоқтап тұрған 20 жоба ішінен тек 10 жобаға субсидиялау, пайыздық мөлшерлемелер, «ТДЖҰА» АҚ инновациялық гранттары, ӘКК қаржыландырулары, «ҚДБ» АҚ кредиттеу желілері сияқты мемлекеттік қолдау түрлері көрсетілуде. Дегенмен, министрлік барлық жобалар бойынша оларды қалпына келтіру жұмыстары жүргізіліп жатқанын, нәтижелі қалпына келтірілген жобалар да бар екендігін атап өткен.
«Баршаңызға белгілі, Қарағанды кремний зауыты (Силициум) индустрияландыру бағдарламасы басталғанға дейін, яғни, 2010 жылы өндіріске қосылды. Бірақ, 2013 жылы кәсіпорын тоқтап қалды. Қайта іске қосу үшін инвестор ретінде «Тау-Кен Самұрық» ҰТК» тартылып, бір жылдан кейін кәсіпорын қайта өнім өндіруді бастады. 2015 жылы 11 мың тоннадан астам өнім өндірілді. Тағы бір мысал, «ҚДБ» АҚ қаржыландырған «Азия Керамик» ЖШС керамогранит өндірісі 2011 жылы тоқтап қалған еді. Жоба «ҚИҚ» АҚ-қа беріліп, жаңа инвестор ретінде «Зерде» ҒӨБ» ЖШС табылып, зауыттың жұмысы 2015 жылғы мамырда қайта жаңғыртылды»,- делінген ақпаратта.
