АЛАҚАНДАЙ АҚПАРАТ

«Польшаның Румиа қаласында армрестлингтен кәсіпқойлар арасында әлем кубогі үшін байрақты бәсеке өткен болатын. Сайысқа әлемнің 52 мемлекетінен 364 саңлақ қатысты. Қазақстан құрамасы сапындағы 7 спортшының 6-уы шардаралық спортшылар. Оғландарымыз финалға дейін Латвия, АҚШ, Франция, Германия, Украина, Польша құрамаларының аптығын басты. Ал, финалда Ресей құрамасын мойындатып, кәсіпқойлар арасындағы әлем кубогін тұңғыш рет жеңіп алды. Польшадағы жарыста ел намысын қорғаған білекті балуандардың тек біреуі ғана Тараздан барған Дмитрий Трубин болмаса, қалған алтауы - Медет Оразбеков, Талғат Ақтаев, Қайырхан Шәмиев, Мағжан Шәмиев, Шынболат Райханов, Қыдырғали Оңғарбаевтар ОҚО Шардара ауданынан».

– Жазира, күні кеше АҚШ-та өткен Әлем чемпионатында күміс жүлде алып, қазақ жұртын бір қуантып қойдың. Оның өзі де - жеңіс. Құтты болсын! Жалпы, додадағы нәтиже көңіліңнен шықты ма?

– Үлкен рахмет. Бұл жүлдемді халқыма арнаймын. Елім болмаса ондай атақ пен абыройдың түкке қажеті жоқ. Ал нәтижеге келетін болсам, шынымды айтсам, алғашында біздің жоспар тым бөлек болатын. Бапкерім екеуміз көпшілікті таң қалдыруды көздегенбіз. Алтыннан алқа тағу былай тұрсын, рекордты жаңартпақ болдық. Өкініштісі, жарысқа екі аптадай уақыт қалғанда жарақат алып, жоспарды жүзеге асыру кейінге қалды. Алла бұйыртса, алдағы додаларда өз мүмкіншілігімді көрсете аламын деген сенімдемін. Көңіл күй түскен жоқ. Бастысы, 2016 жылы Риода өтетін Олимпиада жолдамасы қоржында.