Шымкентте тұңғыш рет велостанция ашылды

"Shymkent bike" - еліміздегі екінші жоба болып табылады. Алғашқысы Астана қаласында қолға алынған. Шымкентте қырық станция орналасатын болады. Бүгін оның төртеуі салтанатты түрде пайдалануға берілді. Жалпы велобекеттерде екі жүз велоқұрылғы бар. Олардың барлығы жалға беріледі. Ол үшін пайдаланушы арнайы карточка алуы тиіс. Шымкенттіктер үшін оның құны 11500 теңге. Ал Астанадағы бекеттердегі велосипедтерді жалға алуға берілетін абонемент 6500 теңге тұрады. Өйткені бас қалада велоқұрылғы тебу науқаны небары алты айға созылады. Ал Шымкентте жыл бойына жалғаспақ. Жоба жетекшілері күн салқындағанда Шымкенттегі велоқұрылғылардың доңғалағын қыс мезгіліне лайықтап ауыстыруды жоспарлап отыр. Айтуларынша, шырайлы шаһарда қыс мезгілі деген аты болмаса, ауа райы аса суық болмайды.
Бекеттердегі велоқұрылғылардың барлығы Франция елінен әкелінген. Әрбірінің құны - 432 еуро. Велосипед салмағы - 24 келі.
Веложобаның ашылу салтанатына қатысқан Шымкент әкімі әрі Қазақстанның Велосипед спорты федерациясының Оңтүстік Қазақстан облыстық филиалының президенті Ғабидолла Әбдірахымов үлкен жобаның іске қосылуымен тұрғындарды құттықтады.
"Бүгін бәріміз үшін қуанышты күн. Бұндай жобалар әлемдегі Лондон, Париж, Токио мен Сеул секілді қалаларда дамып келе жатыр. Қазақстанда ең бірінші Астанада ашылды. Бүгіннен бастап біздің қаламызда да велосипедпен алаңсыз жүруге мүмкіндік туды. Осы жобаның іске қосылуына тікелей іс-қимыл жасағаны үшін Қазақстандағы әл "Самұрық-Қазына" қорының басшысы Өмірзақ Шөкеевке және барша атсалысқан азаматтарға үлкен алғысымды білдіргім келеді.
Велосипед - заман талабы, экономика жағынан өте тиімді көлік. Денсаулыққа пайдалы... Барлықтарыңызды велисипдетке көшуге шақырамын"-деді Әбдірахымов. Мұнан соң қала әкімі алғашқылардың бірі болып абонемент сатып алды және қаланы велосипедпен аралады.
Айта кетейік, Шымкент әкімі бұған дейін де велосипедке отырып, жұртшылықты таң қалдырған болатын. Жақында ол енді жұмысқа велосипедпен қатынайтынын мәлімдеді.