Әлемде өнердің 80-нен астам түрі болса, ебру – кей деректерде ежелгі түріктерден, ал кей мәліметтерде Қытайдан бастау алған су бетіне қоспа арқылы сурет түсіру өнері. Алдымен суда түрлі-түсті бояу арқылы сурет салып, оны қағазға түсіретін ебрудың да өзіндік ерекшелігі бар. Суда бояудың тарап кетпеуі үшін оған арнайы өсімдік суы қосылады.

Натюрморт, пейзаж, портрет, анималистика, кубизм, сюрреализм деп кете беретін бейнелеу өнеріндегі жанрлардың қатары уақыт өткен сайын артып, жаңалары пайда болып жатыр. Соның бірі – құммен сурет салу. Бейнелеу өнерінің жаңа бағыты саналатын өнердің бұл түрі бастапқыда мултьфильмдер мен анимациялық фильмдердің сюжетіне қолданылыпты. Бір қарағанда қиын көрінетін саланың қыр-сырымен танысу үшін біз Шымкент қалалық балалар көркемсурет мектебінің ұстазы Фархад Достаевпен әңгімелесіп қайтқан едік.