Таяуда Үкімет алдағы үш жылдың (2017-2019 ж.ж.) бюджетін мәжілісмендерге таныстырды. Осыған орай бірқатар халық қалаулылары өз ойларын білдіріп, сынайтын жерін сынап, жалпы алғанда, бюджет жобасын іске алғысыз етіп тастады. Бюджетті жан-жақты қарап шыққан мәжілісмендер, әсіресе, сыртқы қарыздың көлеміне таңғалды. Олардың ойынша, сыртқы қарыздардың кесірінен Қазақстан жуық арада өзінің Ұлттық қорынан айрылып қалуы мүмкін.

Таяуда Парламент Мәжілісінің жалпы отырысында палата депутаттары «Төлемдер және төлем жүйелері туралы» заң жобасын екінші оқылымда мақұлдады. Бұл жолы депутаттар аса дауласып, даурыққан жоқ. Қаржы және бюджет Комитетінің мүшесі Дания Еспаева құжатта азаматтардың берешегін әлеуметтік төлемдер мен мемлекет тарапынан тағайындалған жәрдемақы есебінен өндіруді шектеу нормалары қаралғанын айтты. Одан бөлек, қарызды балаларының білім алуға ақша жинақтайтын депозиттердегі ақшадан да өндіруге жол берілмейтін болады.

Жер кодексіне қатысты жұрт митингке шығар шықпасын анықтай алмай арпалысып жатқан тұста жағаласып тағы бір «жаға ұстатар» жаңалық жарқ ете қалды. Астанада 79 миллиард теңгенің пантеоны салынатын болыпты. Түсіндіре кетейін, «пантеон» деп грек тілінен аударғанда құдайларға арналған ғибадат орны дегенді білдіреді екен. Қысқаша айтқанда – Құдайлар үйі. Сонда қазақ 80 миллиард теңгеге қай «құдайына» үй салғалы жатыр?

Қазақстан 1 миллиард доллар қарыз алам деп, елді бір шулатты. Ойлағанға аз ақша емес. Сыртқы қарызымыз онсыз да асып-тасып жатқан қысылтаяң шақта тағы да миллиард доллар қарыз алу экономикасы шатқаяқтап тұрған мемлекетті құзға итеру емес пе?