«Баспана әперемін» деп 11 адамды алдапты
- Жанат ҚАПАЛБАЕВА
Алматы қаласының Әуезов аудандық Ішкі істер басқармасының полиция қызметкерлері қазір сериялық алаяқтық әрекетті тексеріп жатыр. Өйткені, қолға түскен әйел қалада мемлекеттік бағдарлама бойынша баспана алуға қатысты орын алған бірнеше алаяқтық әрекеттерге қатысы бар болуы мүмкін, - деп хабарлайды Алматы қалалық ІІД баспасөз қызметі.
«Қарақожаева В. есімді азаматшаның мемлекеттік бағдарлама бойынша баспана берумен айналысатын мемлекеттік органдарға еш қатысы жоқ. Алайда, солай бола тұра, ол «мемлекеттік бағдарлама бойынша баспана алып беремін» деп бірқатар азаматты сөзіне сендірген. Ал тұрғындар болса, баспана алуға үміт артып, алаяқ әйелге делдалдық көмегі үшін 2 мың доллар және одан да көп ақша берген. Қарақожаева В. адамдарды сендіру үшін олардың баспана алуға мүмкіндіктері бар екендігін растайтын жалған құжаттар (хабарламалар) көрсеткен. Қазіргі уақытта бір ғана біздің бөлімшеге 11 азамат Қарақожаеваның үстінен арыз берді. Алайда, жәбірленушілер бұдан да көп болуы мүмкін. Қазір сотқа дейінгі тергеу амалдары жүргізіліп жатыр», - деді Әуезов аудандық ІІБ бастығының бірінші орынбасары, полиция полковнигі Құмарбек Кеншінбаев.
- алаяқ
- Алматы
- Полиция
- баспана
