Елімізде Қошқар атаның атымен аталатын ауыл да, өзен де, кесене де көп. Елімізден бөлек, өзбек пен қырғыз ағайындар да «Қошқар атадан» құралақан емес көрінеді. Шежірешілердің сөзіне сенсек, Қазақстанда тап осы атауды арқалап тұрған 11 ауыл бар екен.

Иісі мұсылманды жиятын Қағба Меккеде ғана болса, қазақ жеріндегі қағба қайдан пайда болды? Ысқақ бабтың інісі Әбдіжәлил баб қалай Хорасан ата атанды? Осындай сауалдардың жауабын біз де іздеп көруді жөн санадық. Бүгінде Хорасан әулиенің мазарын білетіндер де, онда ат басын бұратындар да аз емес. Әйткенмен Қызылордаға әулиеден бұрын қағбаның көшірмесін көзімен көруге баратындардың көптігі осыған дейін де талай мақалаға арқау болған-ды. Сонымен елдер Хорасан атаға зиярат ету үшін барып қағбаны көре ме, қағбаны көрмекке барып зияратын да жасай сала ма?

Күш атасы Қажымұқан додаға түсерінде: «Уа аруақ, Баба түкті Шашты Әзіз»,-деп айбарланатын әулие осы. Бүгінге ғасырларды аттап өтіп аты жеткен, бейітіне сан мың адам ағылатын кесене  Созақ ауданына қарасты Құмкент ауылы, Жылыбұлақ жерінде орналасқан. Кезінде әулие осы Жылыбұлақты қара кетпенмен өз қолымен қазған екен.

Балаларымен бірге оқып жүрген Нұриланы Бәйдібек би неге әйелдікке алды? Он бес жасар бойжеткен неге үшінші әйел болуға бел байлады? Сексеннен асқан қарт ананы неге балалары жазық далаға жерледі? Осындай сансыз сауалдар төңірегіндегі аңыз-әңгімелерге арқау болған Домалақ ана мазары бүгінгі Оңтүстіктің Қаратау беткейінде жатыр. Немересі Дулат Бұхарадан арнайы Абдулла Шері шеберді шақыртып, салдырған төрт күмбезді кесенеге күн сайын келушілер көбеймесе, азайған емес.