Газетіміздің өткен санында ғана «Оңтүстіктегі ең өзекті мәселе – жұмыссыздық пен қылмыс» деп мақала жазып едік. Араға нөмір салмай, «Оңтүстік Қазақстан облысы жұмыспен қамтылу бойынша елімізде көш бастап тұр» дегелі тұрмыз. Өйткені облыс әкімдігінің баспасөз қызметі таратқан ақпаратқа сүйенсек, Аймақтық коммуникациялар қызметінде өткен брифингте облыстық жұмыспен қамтуды үйлестіру және әлеуметтік бағдарламалар басқармасының басшысы Әсия Темірбаева осылай деп мәлімдепті. Оның айтуынша, бұл көрсеткіш жұмыспен қамтылған азаматтардың 86 пайызының міндетті зейнетақы жарналарын аударғандығы арқылы анықталып отыр екен.

Өсім дегенде, халықтың табиғи өсімі. Оңтүстік Қазақстан облыстық статистика департаменті ұсынған мәлімет бойынша 2015 жылғы 10 айда халықтың табиғи өсімі 57,3 мың адамды құрап, 2014 жылмен салыстырғанда 0,1%-ға кеміген. Бұл негізінен Қазақстанның басқа аймақтарына және шет елдерге кеткендердің есебінен болып отырған құбылыс.