Оңтүстік Қазақстан облысы әкімдігіндегі жылдам ауыздардың таратып жүрген қауесеттері рас болса, осы әкімдіктің баспасөз бөліміндегі бір лауазым иесі өзінің заңды жалақысынан өзге тағы бір жерден жалақы алатын көрінеді. Қай жерден дейсіз ғой? Естуімізше, оған білім басқармасы тарапынан да айлық төленетін көрінеді.

Осы аптада интернет-басылымдардың бірі informburo.kz әкімдердің ай сайынғы жалақысы жайлы ақпарат жариялады. Олардың көпшілігі өз жалақысы жайында жақ ашпаса, енді біреулері шынын айтыпты. Бажайлап қарасақ, халықтың қамын жеген әкімқаралардың қалтасы қалың, қоржыны тоқ. Тіпті, ондай жалақы кейбіріміздің түсімізге де енген емес. Сонымен, ең табысы көп және ең «кедейі» қайсысы екен?

Шымкенттіктердің орташа айлық жалақысы Қазақстанның көптеген қалаларынан кем, бар-жоғы – 84 179 теңге. Ал бүкіл Қазақстан бойынша орташа жалақы көлемі – 133 922 теңге. Оңтүстік өңір жалақы көлемі жөнінен бүкіл аймақтар ішінде 14-орында! Парадокс! Шымкент қанша өркендеп, креатив, даму, бизнес жағынан бүкіл елдің алдына түсіп алғанымен, айлығы көтерілмей-ақ қойды. Керісінше, жолақы 70 теңгеге көтеріліп, Алматыға жетейін деп қалды (Алматыда – 80 теңге). Сол Алматыдағы орташа жалақы – 178 000 теңге десек, сенесіз бе? Бүкіл қазақстандық көрсеткіштен асып түсіп отыр. Жалақымыздың түрі мынау, соған қарамастан жолақыны Алматы, Астанамен теңестірудің қажеті бар ма еді?! 

2016 жылдың 1 қаңтарынан бастап бірнеше санаттағы бюджеттік қызметкерлердің айлығы 40 пайызға дейін өседі. Бұл шара биыл 5 қарашада қабылданған ҚР Еңбек Кодексінде қаралған жалақы төлеудің жаңа жүйесіне сай жүзеге асады.