Танымал журналист Астана әкімін өтірікшіге теңеді

Журналист Дина Елгезек әлеуметтік желідегі парақшасында Исекешевтің бұған дейінгі қызметте отырған кезіндегі "өтіріктерін" жайып салды. 

"Телемост кезінде Президент кнопканы дыз еткізіп басады... Қалғандары айғайлап тұрып зауыттарды ашады... Жарты жылдан кейін әлгі зауытқа барсаңыз, ду айғайдың бу айғай екенін ұғасыз... Исекешов министр болғалы бұндайдың талайын көрдік... "Қазақстанда осыншама жұмыс орны ашылды, мынанша зауыт іске қосылды" деп телекөпір кезінде нөпірлетіп берілген ақпарды да Статистика агенттігінің мәліметімен тексеріп шығуға болады... Телекөпірдің көпіртіп берген біраз өтірігі анықталары сөзсіз..." деп жазды автор.

"Астанаға әкім болып келгені кеше еді... Исекешов екінші лауазымды қызметін тағы өтіріктен бастады... Астана қаласында миллионыншы тұрғын дүниеге келді деп елді бір шулатты... Ресми статистика бойынша, 880 мың адам тұрады... Өткен жылы қалалықтар саны 20 мыңға көбейген... Сонда деймін-ау, жарты жылда астаналықтар 120 мыңға қайдан көбейе қойған... Ол келген бір айда 120 мыңға үй қайда, күй қайда? Бала-бақша, мектеп, жұмыс, инфрақұрылым қайда??? Әлде Президенттің туған күні қарсаңында өтіріктен құралған сыйлықтарды таратып жатқан түрлері ме екен?! Мемлекет басшысының еркесі болса өзіне, бірақ,ел алдында бұл жолы өтірігі өтпеді!" деп ойын түйді журналист. 

Желі қолданушыларының көбі биліктің мұндай өтіріктеріне әбден құлақтары үйренгенін жеткізіп, бір-біріне басу айтқан.