Талғат Ермегияев 14 жылын абақтыда өткізетін болды

Ермегияев аталған мерзімді қатаң режимдегі колонияда өтейтін болады және оның бүкіл дүние-мүлкі тәркіленбек. Сондай-ақ, бостандыққа шыққаннан кейін мемлекеттік органдар мен коммерциялық ұйымдарда басшылық қызмет атқара алмайды. Судья Әділхан Шайхисламов сотталушыны бүкіл мемлекеттік наградаларынан да айырды.

Үкім сот ғимаратының үлкен залында өтті. Орынның көп болғанына қарамастан Ермегияевті қолдауға келген жұрт залға әзер сыйды. Олардың қатарында айыптының туыстары мен достары, БАҚ өкілдері және қоғам белсенділері бар.

Талғат Ермегияев "Астана ЭКСПО-2017" ұлттық компаниясының 10,2 млрд теңгесін талан-таражға салды, пара алды, қызметін асыра пайдаланды деп айыпталған болатын. Дегенмен, экс-төрағаның өзі тағылған осынау айыптардың бірде-бірін мойындаған жоқ. Тіпті, өзінің соңғы сөзінде мұны өзіне қолдан жасалған қастандық екенін де айтып қалды.

Айта кетейік, сәуір айының басында өткен Талғат Ермегияевтің сот отырысына ауыр атлет Илья Ильин айыпталушыны қолдап келген болатын. Тілшілерге берген сұхбатында спортшы: "Шынымды айтсам, бұл жайлы бірінші рет естігенде, көңілім түсіп кетті. Талғат Ермегияевті жақсы басшы ретінде білемін. 2012 жылы біз бірге жақсы жұмыс істеген едік, елімізге олимпиаданың екі дүркін чемпионын әкелген едік. Іс бойынша ештеңе айта алмаймын. Бірақ оны жақсы адам деп білемін, хабарластық, дос болдық деуге де болады. Мұндай басшылар аз", - деп сұхбат берді. Сондай-ақ, чемпион: "Мен Талғат Ермегияев жайлы айтуға келдім. Жақсы адамды қолдауға келдім. Жаным қалап келдім. Енді не боларын білмеймін. Мұны сот шешеді", - деп ойын ашық жеткізген-ді.