Астаналық кәсіпкер депутаттардың үйлеріне деп тіккен перделерінің ақшасын қайтара алмай жүр

 

"Ақшам да, пердем де айырылдым" деген келіншек арна тілшілерінен көмек сұрап келген. Астаналық кәсіпкер Ақмарал Ардаубаева 2014 жылы осы пәтерлердің пердесін тігуге арналған байқауда жеңіп, 25 миллион теңгенің тапсырысын алғанына бір қуанып қалғанын айтады.

Алайда кәсіпкердің айтуынша, парламент шаруашылық басқарамасының өкілдері "тапсырысты дұрыс орындамадыңдар" деп, ақшасын төлемеген. Нақтырақ айтқанда, перделер тігілген матаның қалыңдығы көңілден шықпапты. 2 жыл бойы соттарда жеке кәсіпкердің құқын қорғап келген Мақсат Ілиясұлы: «Байқау жарияланғандағы техникалық талаптарда белгіленген шаршы метріне 585 грамм қалыңдықтағы маталар жиһаз сыртын қаптауға ғана пайдаланылады», - дейді. Мұны бірқатар шетелдік сарапшылар да растаған. Құқық қорғаушы, мұның бәрін былай қойғанда, перделердің депутаттардың пәтеріне ілініп, кейін талапқа сай емес деуінің өзі заңға қайшы дейді.

- Заң бойынша, содан кейін келісімшартта да жазулы тұр. "Егер тапсырыс беруші тауарды өзіне қабылдап алса, өз қоймасына қойса, тауардың иесі тапсырыс беруші болып табылады. Ал жеке кәсіпкер Ардаубаеваның 130 комплект перделері 2 жыл болды шаруашылық басқармасының қоймасында жатыр,-деді құқық қорғаушы. 

Кәсіпкер шағымын айтып, жоғарғы сотқа дейін барған. Алайда, бәрі де Парламент шаруашылық басқармасын жақтапты. Шарасы таусылған Ақмарал басындағы мәселесі бас прокурор Асхат Дауылбаев пен жоғарғы сот төрағасы Қайрат Мәмидің құлағына жетсе дейді. Сол үшін арнайы хат та апарып тапсырды. Тағы бір атап өтерлігі, кәсіпкер "жауапсыз орындаушы" деген тізімге енген соң өзге конкурстарға қатыса алмай отырғанына налиды. Және де "Үкіметке зиян келтірді" деп оған  айыппұл салыныпты. 

Кәсіпкердің адал еңбегін бермей отыр делінген парламент шаруашылық басқармасы бұл мәселе бойынша әзірге еш мәлімет бермеді. Ресми сауалымызға заң бойынша жуық арада жауап береді деп сенеміз. Ал 25 миллион теңгесінен де, пердесінен де айрылған Ақмарал Ардаубаева, ең болмаса кәсіпкерлікті қолдау туралы қаншама заң қабылдаған депутаттар бұл іске араласса дейді.