Шымкент жұртты жеміспен қарық қылмақшы

Шымкент тұрғындарды жеміспен қарық қылмақшы. Күні бүгіннің өзінде қаланың 50 гектар жеріне 33 мыңнан астам алма, алша, шабдалы, алмұрт секілді жеміс көшеттері отырғызылды, деп хабарлайды Оңтүстік Қазақстан облысы әкімдігінің баспасөз қызметі. 

Шымкенттің 2475 гектар болатын жасыл белдеуіне 3 млн. 281 мың ағаш көшеттері отырғызылды. Жасыл желектерді егу мен күтім жасау жұмысын жүргізетін «Жасыл аймақ» коммуналдық мекемесі 2248 га жерге - 2 810 000 дана қарағаш, 125 га жерге – 416 600 дана терек, 52 га жерге - 21 700 емен көшеттерін екті. 

«Жасыл аймақ» бағдарламасы аясында көшет егу жұмыстары қаланың төрт бөлігінде жүргізілді.Олар 1700 га алқапты алып жатқан «Айкөл», 385 га құрайтын «Ақтас», аумағы 300-ге жуық гектар болатын «Бөржар» мен 100 гектарлық «Қайнарбұлақ» учаскелері.

Осыған дейін қаладағы 2564 га жерге ағаш көшеттері егіліп, нәтижесінде, жасыл аймақтың аумағы 5 мың гектарға жетті. Отырғызылған көшеттердің барлығы дерлік жергілікті тәлімбақтардан алынып отыр.

Айта кетейік, алдағы уақытта көшеттерді өзімізде өсіру үшін арнайы 20 гектар жерге тұқымбақ салынбақ. Онда қылқан жапырақты ағаш түрлері мен ақ қайың өсіру және басқада ағаш көшеттерін өсіру қолға алынады деп жоспарлануда.