ОҚО-да мал ұрлап, күн көріп келгендер ұсталды
ОҚО-да полицейлер мал ұрлығын кәсіп еткен қылмыстық топты құрықтады, деп хабарлайды облыстық ІІД баспасөз қызметі.
2016 жылдың қаңтар айында Ордабасы АІІБ-нің кезекші бөліміне, 37 жастағы жергілікті тұрғын арызданып, онда белгісіз тұлға Ордабасы ауданында орналасқан атқорасындағы 18 бас жылқысын ұрлап кеткенін айтқан.
Ордабасы АІІБ-нің қызметкерлері жүргізген жедел алдын алу іс-шаралары барысында 1989, 1990 және 1993 жылдары дүниеге келген Ордабасы, Сайрам және Төлеби аудандарының тұрғындарын күдікті ретінде құрықтады. Ұсталған күдіктілердің бірі алдын да осы тектес қылмыспен сотты болған.
Тергеу барысында белгілі болғандай, барымташылар түнгі уақытта атқораға автокөлікпен барып, үй иесінің ұйықтағанына көз жеткізіп, аттарды жасырын түрде алып шығып, көрші ауылға айдап кеткен. Содан соң ұрланған аттарды сатып, ал түскен ақшаны өз қажеттіліктеріне жаратқан.
Қазіргі таңда полицейлер ұсталған күдіктілердің басқа да мал ұрлығы жайттарына қатыстылығын тексеруде. Жәбірленушіге келтірілген жалпы шығын көлемі 3 миллион теңгеге жуық қаржыны құрап отыр. Күдіктілерден айғақ зат ретінде автокөлік тәркіленіп алынды.
Аталған жайт бойынша ҚР ҚК-нің 188-бабымен «Ұрлық» қылмыстық іс қозғалды. Күдіктілер қамауда. Сотқа дейінгі тергеу амалдары жүргізілуде.
- ОҚО
- ЮКО
- Ордабасы
- қызық ақпарат
