«Үлгермегенімді келесі әкім орындайды»
Жұртшылық жақында ғана атыраулықтарға өткен жылы атқарған жұмыстары туралы есеп берген облыс әкімі Бақтықожа Ізмұхамбетов әне-міне қызметінен кетіп қалады-ау деген сыбыс таратып жүр. Оған өзіндік себеп те жоқ емес. Есеп берген облыс басшысы өз баяндамасында тек бір жылмен шектелмепті.
Өзі қызметке келген жылдар ішінде атқарған жұмыстарын тізбектей шыққан. Онымен қоймай халық тарапынан қойылған сұрақтарға жауап берерде де көпшілікті таң қалдырыпты. «Барлық мәселелеріңізді екі-үш күнде шешемін деп сөз бермеймін. Үлгергенше жасаймын, үлгермегенімді келесі әкім орындайды» деп, халықпен жылы қоштасқан көрінеді. Соған қарағанда Ізмұхамбетов мырза өте жуық арада әкімдік «креслоны» босатпақ ниетте секілді.
Атырау облысының әкімі 20 наурызда өтетін ҚР Парламент Мәжілісінің депутаттығына үміткер екенін ескерсек, аймақтың бірінші басшысы саяси науқан сынынан сүрінбей өтетініне бек сенімді-ау. Әйтпесе, халқымен бұлай жылы қоштаспас еді ғой...
- Бақтықожа Ізмұхамбетов
- Атырау облысы
