Жамбылда 6 жастағы баласынан айырылған ана әлі төсек тартып жатыр

 

Даусы дірілдеп, жиі күрсініп пікір білдірген баланың әкесі Сәкеннің айтуынша, «Жұмыстан үйіне келгенде пышақталып өліп жатқан баласын көрген әйелінің ахуалы ауыр. Төсек тартып [үйде] жатыр».

- Сол кезде жұмыста болдым. Ауруханаға шақырды. Барғанда баланы «өліп қалды» деді. Көшеде көлік қағып кетсе, не басқа себеппен қаза болса, түсінер едім. Кіп-кішкентай баланы пышақтау... айуандық қой. Балам ерекше алғыр еді, - дейді екі баласының бірінен айырылған Сәкеннің жанары жасқа толып.

Қара жамылған әкенің сөзінше, күдіктімен 10 жылдан бері көрші болған. Әпкесінің қолында тұратын жетім балаға жанашырлықпен, сеніммен қараған.

- Түскі сағат бірден беске дейін әйелім мен үлкен ұлым мектепте болады. Балам – сабақта, әйелімнің жұмысы сонда. Осы уақытта кенже балам үйде болып, қарауылдайтын еді. Оқиға осы уақытта болған. Баламның өлімін естіген бүкіл халықтың қабырғасы қайысты. Балам ерекше бала болатын. Амал не, халықты осылай шулатып кетті, - дейді Сәкен.

Айта кетейік, ақпанның 15-і күні жас бала пышақтап өлтірілгеннен кейін 16-17-сі күндері көшеге шығып наразылық білдірген Бурыл ауылы тұрғындары 18-і күні жиналмады. Ал ауыл әкімдігі ғимаратында арнайы штаб жұмыс істеп тұр. Ресми органдар бүгінде күдікті ұсталғанын, ал оның отбасы ауылдан көшірілгенін мәлімдеді.