Назарбаевтың баспасөз хатшысы министр болды
ҚР Ақпарат және коммуникация министрі болып ҚР Президентінің баспасөз хатшысы болып жүрген Дәурен Абаев тағайындалды.
Дәурен Абаев 1979 жылы Алматы облысында туған. Еңбек жолын 2001 жылы ҚР Сыртқы істер министрлігінің орталық аппаратында бастаған. 2003-2007 жылдары ҚР Әзербайжандағы және Нидерланд Корольдігіндегі Елшіліктерінде дипломатиялық қызмет атқарды.
2007 жылдың мамыры мен 2007 жылдың желтоқсаны аралығында ҚР СІМ Баспасөз қызметі бөлімінің бастығы, 2007 жылдың желтоқсаны мен 2008 жылдың желтоқсанында ҚР Президенті Протоколының бас сарапшысы, консультанты, кейін ҚР Президенті Баспасөз хатшысының орынбасары, ҚР Президенті Әкімшілігінің Мемлекеттік бақылау және аумақтық-ұйымдастыру жұмысы бөлімінің мемлекеттік инспекторы болды.
2011 жылдың қазанында Мемлекет басшысының Өкімімен Қазақстан Республикасы Президентінің Баспасөз хатшысы болып тағайындалды.
2013 жылдың шілдесінде Мемлекет басшысының Өкімімен Қазақстан Республикасы Президентінің кеңесшісі - Қазақстан Республикасы Президентінің Баспасөз хатшысы болып тағайындалды.
Айта кетейік, кеше Ақордада өткен кеңесте Президент жаңа уәкілетті мемлекеттік орган – Ақпарат және коммуникация министрлігін құруды тапсырған болатын.
«Ақпараттық саясатқа келер болсақ, бұл функция қазір басқа министрліктің құзырында тұр. Үкіметте бұл саланы үйлестіріп отырған ешкім жоқ, ақпараттық жұмысқа бөлінген мемлекеттік ақша қайда кетіп, қайдан келіп жатқанын ешкім бақылап отырған жоқ. Сондықтан, Бес реформаның орындалу барысын тиімді тарату үшін қазіргі ақпараттық қауіп-қатерлердің алдын алу үшін жаңа уәкілетті мемлекеттік орган - Ақпарат және комуникация министрлігін құруды тапсырамын», - деп атап өтті Мемелкет басшысы.
- Дәурен Абаев
- Даурен Абаев
- президент
- Нурсултан Назарбаев
- Корреспондент
- қызық ақпарат
