Астана тұрғыны Шымкент әкімінің құлағына «алтын сырға» тақты (фото)
Астана тұрғыны Азамат Көшенов Шымкент қаласының әкімі Ғабидолла Әбдірахымовқа сәлемдемесін жолдады. Елордалық азаматты Шымшаһардағы ескерткіштердің жайы мазалаған. Нақтырағы, қаладағы танымал тұлғалардың құрметіне орнатылған ескерткіштер туралы толық ақпараттың жоқ болуы астаналықты алаңдатып отыр. Бұл туралы ол «фэйсбук» әлеуметтік желісіндегі парақшасында ой тастады.
«Ғани Іляев - бұл кісі кім? Бьюстке қарағанда бұл кісі әлі тірі-ау. Өйткені туған жылы не қайтқан жылы, атқарған қызметі жазылмаған. Шымкент қаласының әкіміне алтын сырға. Әкім мырза, Шымкент қаласының ескерткіштерін бір аралап шығыңызшы. Өтініш білдіруші: Шымкент қаласының қонағы» деп жазды елордалық азамат. Соған қарағанда астаналық тұрғын Шымкент көшелерінің бойын аралап, арнайы анализ түзген секілді. Бірақ, қала әкімінің бұл мәселеге қаншалықты назар аударатыны алдағы уақыттың еншісінде.
