Бүгін еліміздің бас қаласы Астанада миллионыншы тұрғынның дүниеге келгені туралы ақпарат тарап, жұртшылық қуанған болатын. Алайда бұл статистикаға күдікпен қарағандар саны басым. Себебі олар небәрі екі айда астаналықтар санының 120 мыңға артуы мүмкін емес дегенді айтып отыр. Бұл әсіресе әлеуметтік желілерде қызу талқыланып, мұндай статистиканы мазаққа айналдырғандар да табылды. Тіпті бірі өткен жылдың қыркүйек айында Астанада жаппай бала көтеру науқаны орын алды деп қалжыңдап жазған. Басым көпшлігі мұндай мәліметті таратқан биліктен ел алдына шығып, аз ғана уақыттың ішінде халық санының бұлайша артуын түсіндіріп беруді талап етіп отыр. Олардың қатарында танымал саясаткер Айдос Сарым да бар.

Астананың миллионыншы тұрғынына Саида есімі берілді. Енді бүлдіршін ата-анасымен бірге Астана әкімі Әсет Исекешев табыс еткен пәтерде тұратын болды. Сәбидің әкесі дүниеге қызының келуі үлкен қуаныш әкелгенін айтуда. Себебі қызды болған күні оның өз әкесі өмірге келіпті. Демек, бұл отбасыда енді бір күнде екі туған күн иесінің қуанышы тойланатын болады.