ОҚО-да биліктің шарасыздығынан ауыл халқы 11 жылдан бері ауыз сусыз отыр
Оңтүстік Қазақстан облысы, Сарыағаш ауданы, Достық елді мекенінде он үйді паналаған халық он бір жылдан бері ауыз су мен көгілдір отынсыз өмір сүруге мәжбүр. Бұл жағдайды шешуге биліктегілердің ле құзыры жетпей келген. Оған себеп - ауылдың шекараға жақын орналасуы.
Осы мақсатпен аймақ басшысы Бейбіт Атамқұловтың төрағалығымен жиын өтті. Күн тәртібінде 2005 жылы Қазақстан Республикасы мен Өзбекстан Республикасы арасындағы шекара демаркацияланып, шекара сызығы анықталғаннан кейін онда қалып қойған Достық елді мекеніндегі 10 үйдің мәселесі қаралды. Жиында мәлім болғандай биліктегілер 10 отбасыны көшіру мақсатында Достық ауылына баратын Абай-Калхабад тас жолының екі жақ бетінен 80 га жерді беру үшін Достық елді мекенінің оңтайландырылған жоспарын жасап қойған. Ал тұрғындар мүлкін заңдастыруға көмектесіп, мемлекет тарапынан өтемақы алып, басқа жерге көшіру туралы өтініштерін жеткізіпті. Жиынды қорытындылаған облыс әкімі бұл мәселе бойынша арнайы жұмыс тобын құруды және ауыл тұрғындарын басқа жерге қоныстандырғанша ауыз сумен қоса сығымдалған газбен қамтамасыз етілуі қажеттігін айтты. Сонымен қатар, аудан әкімдігіне шұғыл түрде аталған үйлер бойынша түгендеу жұмыстарын жүргізуді және мүлікті заңдастыру бойынша құжаттарын рәсімдеуге көмектесуді тапсырды.
Айта кетейік, аталған ауылға мемлекет есебінен газ, су тарту экономикалық жағынан тиімсіз болғандықтан бүгінге дейін ауыл тұрғындары көгілдір отынсыз және ауыз суды 3 шақырым қашықтықта орналасқан Ұшқын елді мекенінен тасымалдап ішіп отыр.
- ОҚО
- ЮКО
- ОҚО халқы ауыз сусыз отыр
- Бейбут Атамкулов
- Бейбіт Атамқұлов
- корерспондент
- қызық ақпарат
