Ақтөбеліктер өздерін "қала тұрғынымын" деп айтуға ұялады (фото)
Ақтөбеде қалада тұрғанымен, даладағыдай күн кешіп, тіпті өздерін "қалалықпыз" деп айтуға ұялатын тұрғындар бар. Облыс орталығындағы шаңы шығып, жолы бұзылып, күл-қоқысы шашылып жатқан көшелердің тұрғындары осылай дейді. Бұл туралы aktobenews.kz жазды.
Аталған сайт шаһардың «Шанхай» деп аталып кеткен бөлігіндегі О.Кошейвой көшесінің адам шошытарлық көрінісін жариялауды ұмытпаған. Тұрақты оқырманы Айгүл Балымбетова жолдаған суреттер тек бір ғана көше емес, қаланың көп бөлігіндегі жағдайды байқатады.
— Көшеміздің асфальті қопарылып, шаң басып жатыр. Тау-тау болып үйілген құм мен тасты төгіп кеткелі көп болды. Онсыз да күлімсі иіс қолқаны қабатын «Шанхайдың» осы күндері ауасы мүлдем ластанды. Балалар ойнайтын алаң екі бастан жоқ. Аулаларымыздың маңы күл-қоқысқа толып кетті. «Ақжол ЛТД» коммуналдық мекемесінің адамдары қоқыс төккенге ақша сұрап күн сайын келеді. Ал қоқыс жәшіктері жоқ. Амалсыз тұрғындар далаға лақтырып тастап кетеді. Күннің ыстығында борсып, сасып кеткен дорбаларды ешкім жинамайды, — деп көше тұрғыны шағымын жеткізуді сұрады.
Айта кету керек, биыл Ақтөбе қаласындағы жолдарға жөндеу жүргізу үшін қазынадан 2 миллиард теңге қарастырылып отыр. Жөнделетін көшелердің тізімінде О.Кошевой атындағы көше жоқ. Бірақ, оның жолындағы асфальтті қырып алып тастап, тау етіп үйіп кеткеніне көп болыпты.
- Ақтөбе
- Бердібек Сапарбаев
- Бердибек Сапарбаев
- қала тұрғыны
- қалалықтар
- Корреспондент
- қызық ақпарат
